Ил Дархан Дойду Конституциятын күнүнэн Арассыыйа эдэр гражданнарыгар пааспардары туттарда

Бүгүн, ахсынньы 12 күнүгэр, дойду бүттүүнэ РФ Конституцията ылыныллыбыта 30 сылын бэлиэтиир. Бырабыыталыстыба Өрөспүүбүлүкэ саалатыгар буолбут үөрүүлээх тэрээһиҥҥэ Ил Дархан Айсен Николаев дойду гражданинын пааспарын 10 үөрэнээччигэ туттарда.

«Дойдубут Конституциятыгар – биһиги олохпут, чугас дьоммут- сэргэбит, оҕолорбут инникилэрэ мэктиэлэнэр. Биһиги Конституцияҕа киирбит бырааппытынан, аныгы үйэҕэ улуу Арассыыйа оруолун чопчу өйдөөн тураммыт инникибитин тутабыт. Бүгүн, бу бэлиэ күҥҥэ Арассыыйа гражданнара буолалларын туоһулуур пааспары Саха сирин эдэр олохтоохторо ылаллар. Мин эрэнэбин, кинилэр бу күнү олохторун тухары өйдөөн хаалыахтара – кинилэр дьиҥнээх патриот быһыытынан уонна дойдуларын дьоһуннаах гражданнара буолан Аҕа дойдуларын иннигэр киэн тутта олохторун устун хаамыахтара», – диэтэ Айсен Николаев.

Санатан эттэххэ, 2020 сыл тохсунньутугар Арассыыйа Бэрэсидьиэнэ Владимир Владимирович Путин Федеральнай Мунньахха суругар эппитэ: «Дойду Сүрүн сокуонугар биһиги правовой киэҥ эйгэбитигэр Арассыыйа Конституциятыгар приоритеттары быһаччы мэктиэлиир уларытыылары киллэрэр кэммит кэллэ дии саныыбын».

«Биһиги, Саха сирин олохтоохторо, төрөөбүт дойдубут Конституциятыгар уларытыылары киллэриини өйөөммүт, 2020 сыллаахха Бүтүн Арассыыйатааҕы куоластааһыҥҥа көхтөөх кыттыыны ылбыппыт. Конституцияҕа киирбит эбиилэр Арассыыйа Федерациятын үс уон сыл иһигэр ситиһиллибити бигэргэттилэр: ыарахан тургутуу уонна үрдүк ситиһиилэр сылларыгар. Бүгүн биһиэхэ хас биирдиибитигэр күндү уонна сибэтиэй буолар барыта дойду сүрүн докумуонугар ыйылла сылдьар. Бу – биһиги оҕолорбут, кырдьаҕастарбыт уонна үлэһит дьоммут көмүскэллэрэ, доруобуйа харыстабыла, дьиэ кэргэн уонна култуура сыаннастара, дойдубут суверенитета уонна куттала суох буолуута», –диэн бэлиэтээтэ Айсен Николаев.
Айсен Николаев Аҕа дойду көмүскээччилэрин ааттарын ытыктааһын уонна историческай кырдьык көмүскэлин суолтатын бэлиэтээтэ.

«Биһиги өбүгэлэрбит хорсун быһыыларын, анал байыаннай дьайыы дьоруойдарын геройдуу быһыыларын туһунан историяны токурутан суруйууну кимиэхэ да көҥүллүөхпүт суоҕа. «Арассыыйа Федерацията историческай кырдьыгы көмүскүүр. Аҕа дойду көмүскэлигэр норуот оҥорбут хорсун быһыытын, үтүөтүн намтатар сатаммат», – диэн биһиги Конституциябытыгар сурулла сылдьар», – диэн эттэ Ил Дархан.
Дьокуускай куорат 2-с №-дээх национальнай политехническай оскуолатын 8-с кылааһын үөрэнээччитэ Алгыстаан Кривошапкин саастыылаахтарын Арассыыйа пааспарын ылбыттарынан эҕэрдэлээтэ.

«Мин бу үөрүүлээх күн Арассыыйа Федерациятын гражданинын пааспарын ылбыппыттан олус үөрдүм. Дойду Конституциятын кытта билсэн баран, мин төрүөхпүттэн көҥүл бырааптаах гражданин буоларбын бигэтик өйдөөтүм. Мин үөрэнэр бырааптаах, онон, интэриэһинэй наукалары үөрэтиэхпин, куруук сайдыахпын сөп, инникитин бэйэм сөбүлүүр идэбин баһылыыр кыахтаахпын», – диэтэ Алгыстаан.

Ил Дархан РФ Бэрэсидьиэнин Анал бырагырааматын кылаабынай управлениетын Бочуотунай грамотатын СӨ Баһылыгын уонна Бырабыыталыстыбатын Анал бырагырааматын управлениетын салайааччытыгар Андрей Никифоровка туттарда.

РФ Киһи быраабыгар боломуочунайын «Үтүөнү оҥорорго тиэтэйиҥ» мэтээлинэн Ил Түмэн байыаннай сулууспалаахтар, бойобуой дьайыылар бэтэрээннэрин дьыалаларыгар, патриотическай иитиигэ уонна уопсастыбаннай тэрилтэлэргэ сис кэмитиэт старшай референэ Светлана Диодорова-Лаврентьева наҕараадаланна.

РФ Киһи быраабыгар боломуочунайын Махталынан СӨ волонтердарын кытта үлэҕэ киин дириэктэрэ Айыллаан Винокуров бэлиэтэннэ.

«Саха Өрөспүүбүлүкэтин үтүөлээх юриһа» бочуоттаах аат өрөспүүбүлүкэ Баһылыгын уонна Бырабыыталыстыбатын дьаһалтатын ис бэлиитикэҕэ департаменын салайааччытын солбуйааччы Татьяна Кривошапкинаҕа уонна Мэҥэ-Хаҥалас оройуоннааҕы суутун судьуйата Вера Саввинаҕа туттарылынна.