Ил Дархан Докучаевскайга чөлүгэр түһэрии үлэтин бэрэбиэркэлээтэ

Ил Дархан ДНӨ командировкатын чэрчитинэн Докучаевскайга уонна Еленовкаҕа чөлүгэр түһэрэр үлэлэр хайдах баран иһэллэрин бэрэбиэркэлээтэ. Билиҥҥи туругунан нэһилиэнньэлээх пууннарга былааннаммыт 65 эбийиэктэн 40-ча кэриҥэ саҥардыллыбыт.

Ил Дархан Еленовкаҕа олохтоох оскуолаҕа уонна култуура дьиэтигэр сырытта, манна хапытаалынай өрөмүөн оҥоһуллуохтаах. Бөһүөлэккэ дьиэлэри өрөмүөннээһини таһынан, суолу аспааллыахтаахтар. Былааннаммыт түөрт суолтан үһэ аспаалламмыт.

Оттон Докучаевскайга  чөлүгэр түһэриллэн, билигин физкултуура уруоктара уонна күрэхтэһиилэр ыытыллар, 4-с №-дээх оскуола аттыгар баар успуорт былаһааккатын көрдө. Оҕо айымньытын дьиэтигэр сырытта. Бу дьиэҕэ урут хаһан даҕаны өрөмүөн оҥоһуллубатах, ону саҥардар былааннаахтар. Итини сэргэ куоракка IT-киини аһар былаан баар.

« Оҕо айымньытын дьиэтин хайаан даҕаны чөлүгэр түһэриэхпит. Бу Докучаевскай оҕолорун айар дьоҕурдарын уонна култуураларын тирэҕинэн буолуо. Ыччат креативнай уонна аныгы киинин манна аһар кэскиллээх диэн көрөбүт. Онно Саха сиригэр баар курдук IT-киин эмиэ тэриллиэ. Олохтоох ыччат үөрүүнэн ылыныа диэн эрэнэбин», – диэтэ  Айсен Николаев.

Докучаевскайга бассейннаах успуор комплексын өрөмүөннээһин уонна чөлүгэр түһэрии үлэтэ бүтэн эрэр. Ил Дархан бэлиэтээбитинэн, үлэ урутаан иһэр – былаан быһыытынан эбийиэги 2025 с. туттарыахтаахтар. Ол гынан баран сүрүн тутар-таҥар үлэлэр бу Саҥа дьылга диэри бүтүөхтэрэ.

Айсен Николаев бэрэбиркэлээһин түмүгүнэн ДНӨ Бырабыыталыстыбатын Бэрэссэдээтэлэ Евгений Солнцев кыттыылаах мунньаҕы ыытта. Докучаевскайга өрөмүөннэнэр 65 эбийиэктэн 53 элбэх кыбартыыралаах олорор дьиэ. Олох-дьаһах хаһаайыстыбаларын, үөрэхтээһин эбийиэктэрин, суолу тутуу, чөлүгэр түһэрии үлэлэрэ былааннаналлар. Бу куораттарга Саха сирин быраастара үлэлэһэллэр. Кинилэр Докучаевскай уонна Кировскай куораттарыгар 900 тахса эпэрээссийэни оҥордулар.

Кировскайга 50-н таха социальнай эбийиэк чөлүгэр түһэриллибитэ. Чуолаан, куораттааҕы киин балыыһа, 2 оскуола, 3 уһуйаан, музыка оскуолата, бибилэтиэкэ. Ититэр ситим, куорат уулуссаларын сырдатыы, үөрэх тэрилтэлэрин аһыыр сирдэрин уотунан хааччыйыы, Кыайыы пааркатын уонна оҕо успуордун былаһааккатын тупсарыы ыытыллыбыта. Сибэтиэй Иоанн Кронштадскай таҥаратын дьиэтин чөлүгэр түһэриигэ өрөспүүбүлүкэ көмөлөһөр.