Ил Дархан Дьокуускай уонна Нерюнгри маастар-былааннарын олоххо киллэриигэ бүддьүөт сайаапкаларынан үлэни түргэтэтэргэ соруйда

Дьокуускайы уонна Нерюнгрины сайыннарар маастар-былаан чэрчитинэн 2025 сылга социальнай уонна инфраструктурнай эбийиэктэри олоххо киллэрии туһунан от ыйын 15 күнүгэр Айсен Николаев ыыппыт бырайыактыыр офис мунньаҕар этиллибитэ. Ил Дархан от ыйын 31 күнүгэр диэри наадалаах эбийиэктэри чорботон үбүлүүр былааны оҥорорго соруйбута.   

“Кэлэр 2025 сылга Дьокуускайга уонна Нерюнгрига оскуолалары, уһуйааннары, ОДьКХ, доруобуйа харыстабылын эбийиэктэрин тутуу былааннаммыта. 2025-2027 сс. хайаан да үбү тардар сорук турар. Федеральнай бүддьүөттэн эрэ буолбакка, атын сайдыы институттарыттан эмиэ”, — диэтэ Айсен Николаев.

Маастар-былааҥҥа олоххо киирэн эрэр “Спортивнай” микрооройуону кэлим сайыннарыы, үс уопсастыбаннай территорияны тупсарыы, Нерюнгритааҕы Кииннэммит балыыһа блогун өрөмүөннээһин уонна да атын бырайыактар бааллар.

Ил Дархан маастар-былаан тэрээһиннэрин үбүлүүргэ федеральнай министиэристибэлэргэ, биэдэмистибэлэргэ өрөспүүбүлүкэттэн бүддьүөт сайаапкаларын оҥорон ыытары түргэтэтэргэ соруйда. Бырайыактыыр-сметнэй докумуону хаачыстыбалаахтык  оҥорууга улахан болҕомтону ууралларыгар эттэ, диэн иһитиннэрэр СӨ Ил Дарханын уонна Бырабыыталыстыбатын пресс-сулууспата.