Дьокуускайдааҕы “Сулустаах” уонна  “Спортивнай” микрооройуоннар сайыннарыы боппуруостарын дьүүллэстилэр

Саха сиригэр саахалланар туруктаах дьиэлэртэн көһөрүү бырагырааматынан тутулла турар “Сулустаах” уонна  “Спортивнай” микрооройуоннары кэлимник сайыннарыы боппуруостарын дьүүллэстилэр. От ыйын 15 күнүгэр Ил Дархан Айсен Николаев “РИА” АУо СЗ инвестиционнай бырайыактарын олоххо киллэриигэ сүбэ мунньаҕы ыытта.

Сүбэ мунньахха «Комплексное развитие транспортной инфраструктуры городского округа «город Якутск» на 2017-2032 годы» бырагыраама чэрчитинэн суол-уулусса ситимнэрин тутуу уонна уларытан оҥоруу, микрооройуоннарга инженернэй ситим схематын кэлимник оҥоруу боппуруостара дьүүллэһилиннилэр.

— Өрөспүүбүлүкэтээҕи ипотечнай агентство “Сулустаах” уонна  “Спортивнай” микрооройуоннар сирдэрин-уоттарын кэлимник сайыннарар бырайыагы олоххо киллэрэр бас-көс тэрилтэнэн буолар. Боппуруостар быһаарыллан иһиилэрин түргэтэтэр сыалтан былаас таһымнарыгар биэдэмистибэлэр икки ардыларынааҕы көдьүүстээх бииргэ үлэлээһин барыан наада, — диэтэ Ил Дархан.   “Хонтуруоллааһын эрэ буолбатах, үөскүү турар боппуруостары быһаарыы”, — диэн эбэн эттэ.

“Сулустаах” микрооройуоҥҥа элбэх кыбартыыралаах 10 дьиэ тутуллубут, билигин 7 дьиэ тутулла турар. Ону тэҥэ социальнай эбийиэктэр – оскуола, каток, уһуйаан, инженернэй ситимнэр уонна суоллар тутуллаллар. “Олорор дьиэ уонна куорат эйгэтэ” нацбырайыагынан манна сааххалланар туруктаах дьиэлэргэ олорор дьон, ол иһигэр 17 кыбартаалтан, көһөн кэлэллэр.

Балаҕан ыйыгар микрооройуоҥҥа 112 МВт хочуолунай үлэҕэ киириэҕэ. Ил Дархан бу үлэни көрүөхтээх-истиэхтээх тэрилтэни суһаллык быһаара охсоллоругар соруйда. Ону тэҥэ туһааннаах биэдэмистибэлэргэ микрооройуону массыына уонна уопсастыбаннай тырааныспар суолунан хааччыйа охсоллорун ыйда.

17 кыбартаал миэстэтигэр тутуллуохтаах “Спортивнай” микрооройуоҥҥа 9 тыһ. кв.м. уопсай иэннээх элбэх кыбартыыралаах дьиэ тутулла турар. Уһуйаан, успуорт саалата тутуллаллар. Сааххаланар туруктаах 11 элбэх кыбартыыралаах дьиэлэри көһөрүү бара турар диэн иһитиннэрэр СӨ Ил Дарханын уонна Бырабыыталыстыбатын пресс-сулууспата.