Ил Дархан Донбасска үлэлээбит быраастарга судаарыстыбаннай наҕараадалары туттарда

Сэтинньи 15 күнүгэр Ил Дархан Айсен Николаев  Иван Луцкан салалтатынан Донбасска үлэлээбит быраастар биригээдэлэрин кытары көрүстэ уонна кинилэргэ судаарыстыбаннай наҕараадалары туттарда.

—  Мин биһиги быраастарбытынан киэн туттабын, эһиги сыалгытын-соруккутун  толоруоххутугар эрэллээх этим.  Донбасс олохтоохторугар оҥорбут мэдиссиинискэй көмөҕүт иһин ис сүрэхтэн махтанабын. Эһиги  эмтэнээччилэргэ тыһыынчанан сүбэни-аманы биэрдигит, сүүһүнэн эпэрээссийэни оҥордугут. Эһиги – дьиҥнээх патриоттаргыт. Үрдүк таһымнаах эпэрээссийэлэр, ыарыыны быһаарыы, мэдиссиинискэй сүбэ-ама, ыйыы-кэрдии барыта  Саха сирин доруобуйатын харыстабыла олус үчүгэй таһымнааҕын дакаастаатылар, — диэтэ Айсен Николаев.

Ил Дархан хорсун быһыыны көрдөрбүт үрүҥ халааттаах аанньалларга  судаарыстыбаннай наҕараадалары туттарда.

Наҕараадаланнылар:

“Саха Өрөспүүбүлүкэтин  үтүөлээх бырааһа” үрдүк аатынан – Офтальмология өрөспүүбүлүкэтээҕи килииничэскэй балыыһатын офтальмолог-бырааһа Иннокентий Белолюбскай;

“Саха сирин доруобуйатын харыстабылын үтүөлээх үлэһитэ” аатынан — Офтальмология өрөспүүбүлүкэтээҕи килииничэскэй балыыһатын кылаабынай бырааһа Иван Луцкан;

Ил Дархан Грамоталарынан:

Өрөспүүбүлүкэтээҕи 3 №-дээх килиниичэскэй балыыһа кардиолог-бырааһа Туйара Румянцева  уонна Өрөспүүбүлүкэтээҕи 2 №-дээх балыыһа-Суһал мэдиссиинискэй  көмө киинин кардиолог-бырааһа Филипп Харлампьев;

“Гражданскай килбиэн” бэлиэнэн – Мииринэй Оройуоннааҕы киин балыыһатын бырааһа Юлия Розмерица уонна Офтальмология өрөспүүбүлүкэтээҕи килииничэскэй балыыһатын эпэрээссийэлиир мэдиссиинискэй сиэстэрэтэ Екатерина Стручкова;

СӨ бырабыыталыстыбатын Грамотатынан — Офтальмология өрөспүүбүлүкэтээҕи килииничэскэй балыыһатын офтальмолог-бырааһа Стефан Георгиев;

Быраабыталыстыба Махтал суругунан — Офтальмология өрөспүүбүлүкэтээҕи килииничэскэй балыыһатын рентген-лаборана Александр Максимов.

ххх

Бу күн наҕараадаламмыт быраастар  тута Офтальмология өрөспүүбүлүкэтээҕи килииничэскэй балыыһатын актовай саалатыгар суруналыыстары кытары көрүстүлэр, ыйытыыларга хоруйдаатылар.

Биригээдэ салайааччыта Иван Луцкан иһитиннэрбитинэн, кинилэр бу сырыыларын кэмигэр Луганскай Норуодунай Өрөспүүбүлүкэ  бырабыыталыстыбатын ыҥырыытынан Луганскайга эмиэ үлэлээтилэр. Луганскайга өрөспүүбүлүкэтээҕи килиниичэскэй балыыһаҕа сыыппаралаах аппарааттара  итэҕэс тэриллэрдээх турара (маннык эргэ тэрили биһиги быраастарбыт Дьокуускайга көрө  иликтэр).  Онуоха  биһиги быраастарбыт эпэрээссийэҕэ туттуллар матырыйааллары дойдуларыттан аҕалан, аппарааты үлэлэттилэр уонна үлэһиттэргэ  хас да көрдөрөр эпэрээссийэни оҥордулар.

“Кировскай олохтоохторо Саха сирин көмөтүн үрдүктүк сыаналаатылар уонна өрөспүүбүлүкэ баһылыгар Айсен Николаевка, доруобуйа харыстабылын миниистирэ  Елена Афанасьеваҕа  махтал тылларын эттилэр”, — диэтэ Иван Луцкан.

Көрсүһүүгэ хас биирдии быраас Донбасска сырыытыттан өйдөнөн хаалбыт түгэннэриттэн кэпсээтэ, Сахабыт сиригэр мэдиссиинэ өҥөтө босхотун ааһан, үрдүк хаачыстыбалааҕын, анаалыс арааһа кэмигэр оҥоһулларын уо.д.а.  санааларын үллэһиннилэр.  Кырдьыга да, туох барыта тэҥнэбилгэ биллэр, суолталанар.

“Биһиэхэ саамай күндү уонна умнуллубат – олохтоохтор уонна ыарыһахтар ис сүрэхтэриттэн эппит махталлара”, — диэн көрсүһүү кыттыылаахтара бары  да уйадыйан ыллылар.

Дьиэ кэргэттэрин, сүрүн үлэлэрин-хамнастарын хаалларан туран сорудаҕы толоро  барбыт идэлэригэр бэриниилээх быраастары Дьокуускай куорат мэдиссиинискэй кэллиэһин волонтер-устудьуоннара эҕэрдэлээтилэр.

(Бу көрсүһүү туһунан сиһилии “Саха сирэ” хаһыат аныгыскы нүөмэригэр ааҕыаххыт)