Ил Дархан Доруобуйа национальнай күнүнэн эҕэрдэлээтэ

Өрөспүүбүлүкэҕэ  Доруобуйа национальнай күнэ 2000 сылтан бэлиэтэнэр.  Бу бэлиэ күнүнэн Ил Дархан Айсен Николаев Саха сирин олохтоохторун эҕэрдэлээтэ.

-Хоту сир олохтоохторун доруобуйаларын араҥаччылааһын, харыстааһын судаарыстыбаннай бэлиитикэ биир тумус туттар боппуруоһунан буолар. Саха сиригэр номнуо иккис сылын доруобуйа харыстабылын сайыннарыыга уонна  доруобуйаны бөҕөргөтүүгэ  ыйаах үлэлиир. Ыйаах иитинэн  2021-2030 сыллар Доруобуйа уон сылынан биллэриллибиттэрэ.  Ый анараа өттүгэр Арктическай зонаҕа анал медиссиинискэй көмөнү оҥорууга саҥа пилотнай бырайыак үлэтин саҕалаабыта.Оттон бэҕэһээ Бүлүүгэ балыыһа улахан комплекса үлэҕэ киирдэ. Маны таһынан саҥа балыыһалар Уус Маайаҕа, Чурапчыга, Хонууга тутуллаллар. Ытык Күөлгэ саҥа поликлиника дьиэтэ тутулла турар. Федеральнай бүддьүөттэн доруобуйа харыстабылын салаатыгар үбүлээһин кээмэйэ үрдээһинин ситистибит, — диэн эҕэрдэ тылыгар Айсен Николаев эттэ.