Ил Дархан Арассыыйаҕа Орто анал үөрэх күнүнэн эҕэрдэтэ

Саха сирин ытыктабыллаах олохтоохторо! Ытыктабыллаах биир дойдулаахтарым!

Саха Өрөспүүбүлүкэтин салалтатын уонна тус бэйэм ааппыттан РФ Орто анал үөрэх күнүнэн эҕэрдэлиибин!

Бу бэлиэ күн РФ Бэрэсидьиэнэ Владимир Путин ыйааҕынан 2022 сыллаахха олохтоммута. Дойдубутугар социальнай экэнэмиичэскэй уонна социальнай эйгэ сайдыытыгар орто анал үөрэх ситимэ дириҥ суолталаах.

Күн ахсын оробуочай идэлэр суолталара үрдүүр. Судаарыстыбаннай хабааннаах дьоһун суолталаах сыаллары-соруктары быһаарарга үрдүк таһымнаах каадырдарга ирдэбил улаатан иһэр. Үлэ ырыынагар кэллиэстэри уонна тиэхиньикумнары бүтэрээччилэр ирдэнэллэр. Ол иһигэр үрдүк технологиялаах уонна наука күүһүн туһанар производстволарга. Үрдүк хамнастаах миэстэлэргэ орто анал үөрэхтээх исписэлиистэр ыҥырыллаллар.

Өрөспүүбүлүкэҕэ 42 орто анал үөрэх кыһатыгар 24 тыһыынчаттан тахса устудьуон үөрэнэр.

Саха сиригэр биэс сылга орто анал үөрэх тэрилтэлэрин кэлимник саҥардыыга киэҥ хабааннаах бырайыактар олоххо киллэрилиннилэр. Ол иһигэр «Үөрэх» национальнай бырайыак иитинэн эрэгийиэҥҥэ 14 үөрэх кыһатыгар 55 мастарыскыай тэрилиннэ.

Быйылгыттан 2027  сылга диэри 25  орто анал үөрэх кыһатын тэрилинэн хааччыйыыга уонна хапытаалынай өрөмүөҥҥэ бырагыраама үлэлиир. Биһиги кэллиэстэргэ салгыы аныгы инфраструктураны тэрийиигэ үлэлэһиэхпит.

2023 сылга Уһук Илин эрэгийиэннэригэр кэллиэстэргэ аныгы мастарыскыайдары оҥорорго анаан 500  тахса мөл.солк ыытыллыа, уонна өрөспүүбүлүкэ кэллиэстэрэ бырагыраамаҕа кыттыахтара.

Биһиги бастыҥнары биһириибит. Үлэ сылыгар өрөспүүбүлүкэбит орто анал үөрэҕин кыһаларыгар 5 мөл солк суумалаах граннары олохтуурга,  «Лучший в образовании», «Лучший в профессии», «Лучший в науке», «Лучший в спорте», «Лучший в творчестве», «Лучший в общественной деятельности» номинацияларга, оттон «Лучший колледж» номинацияҕа 10 мөл солк. суумалаах граны олохтуурга ыйаахха илии баттаабытым. Бу талан ылбыт идэлэригэр табыллан үлэлииллэригэр, салгыы сайдарга көҕүлүүрүгэр эрэнэбин.

Бүгүҥҥү бэлиэ күҥҥэ преподавателлэргэ, производственнай үөрэх маастардарыгар, орто анал үөрэх кыһатын бары үлэһиттэригэр истиҥ махталбын тиэрдэбин! Бэйэҕит үлэҕитинэн эһиги эдэрдэргэ саҥа кыахтары арыйалларыгар,  араас идэлэри баһылыылларыгар, кыахтарын олоххо киллэрэллэригэр көмөлөһөҕүт. Устудьуоннаргытыгар элбэх бириэмэни анаан кыһамньылаахтык сыһыаннаһаргытыгар махтанабын.

Күндү доҕоттор! Эһиэхэ барыгытыгар олоххо ситиһиилэри, чэгиэн доруобуйаны, этэҥҥэ буолууну, эрчими, инникигэ эрэли!

Саха Өрөспүүбүлүкэтин Ил Дархана                                                                     А.С. Николаев