Ил Дархан эҕэрдэтэ

Ытыктабыллаах урбаанньыттар!

Саха Өрөспүүбүлүкэтин салалтатын уонна тус бэйэм ааппыттан эһигини идэлээх бырааһынньыккытынан – Арассыыйа урбаанньыттарын күнүнэн эҕэрдэлиибин!

Эһиги үлэҕит – биисинэһи, экэниэмикэни уонна уопсастыбаны бүттүүнүн сайыннарыыны күүстээх хамсатааччы. Бүгүн Саха сиригэр 130 тыһыынча кэриҥэ киһи урбаанынан дьарыктанар уонна хас биирдиигит өрөспүүбүлүкэни инники күөҥҥэ таһаарыыга, технологиялары сайыннарыыга, наадалаах өҥөлөрү уонна үлэ миэстэлэрин тэрийиигэ дьоһун кылаатын киллэрэр.

Быйыл 3 тыһыынчаттан тахса өрөспүүбүлүкэ дьоҕус уонна орто  тэрилтэлэрэ судаарыстыба кыттыылаах бөдөҥ хампаанньаларга поставщиктарынан буоллулар, ол бөдөҥ сакаасчыттар кээмэйдэрин 67,43 млрд солкуобайга диэри улаатыннарарга кыаҕы биэрдэ – ааспыт сыллааҕар икки төгүлтэн ордугунан. Бу сыыппаралар урбаанньыттар кэм ыҥырыыларыгар түргэнник бэлэм буолууларын, күрэстэһэр кыахтаах бородууксуйаны оҥороллорун уонна хаачыстыбалаах өҥөнү биэрэллэрин кэрэһилииллэр.

Креативнай экэниэмикэ эйгэтигэр үгүс урбаанньыт үлэлиир. Саха сирэ Арассыыйаҕа уонна аан дойдуга бэйэтин көрдөрүүтэ чыҥха уларыйда. Өскөтүн урут биһигини алмааһы уонна кыһыл көмүһү хостооччу курдук билэр буоллахтарына, бүгүн өрөспүүбүлүкэ үчүгэй киинэлэринэн, компьютер оонньууларынан, саҥа технологияларынан билиннэ. Бу креативнай салааҕа үлэлээччилэр үлэлэрин түмүгэ.

Саха сирин урбааныгар кэскиллээх хайысханан туризм буолар. 2024 сылга өрөспүүбүлүкэҕэ туристар кэлиилэрэ үрдүк рекорду көрдөрдө – 264871 киһи. “Туризм и индустрия гостеприимства” национальнай бырайыак чэрчитинэн федеральнай куонкурус кыайыылаахтарынан буоллубут, ону тэҥэ Уһук Илин субъектарын экэниэмикэлэрин үүнүүтүн киинин социальнай сайдыыларын куонкуруһугар туристар маршруттарын тэрийиигэ бэйэбит бырайыактарбытын  ситиһиилээхтик көрдөрдүбүт.

Дьоһун боппуруостары, уопсай соруктары уонна саҥа сыаллары дьүүллэһиигэ өрөспүүбүлүкэҕэ сыл ахсын урбаанньыттар пуорумнара ыытыллан, көхтөөх бизнесменнэри, уопсастыбаннай тэрилтэлэри уонна былаас уорганнарын түмэр. Бу уопуту атастаһыыга уонна саҥа кыахтары көрдөөһүҥҥэ  дьоһун былаһаакканан буолар.

Биһиги эрэгийиэн таһымыгар омук табаарын солбуйуу бэлиитикэтин олоххо киллэриигэ эрэллээхтик хардыылыыбыт. Бу үлэҕэ тутаах тэрилинэн биирдэстэринэн олохтоох оҥорон таһаарааччылары өйүүргэ туһуламмыт “Бизнес-экспо” салаалар икки ардыларынааҕы быыстапка буолар.  Бүгүн Саха сиригэр 2709 табаары оҥорооччу үлэлээн, ис ырыынагы сайыннарарга көмөлөһөллөрүн таһынан эрэгийиэн экэниэмикэтин көҕүлүүллэр.

Байыаннай дьайыы кыттыылаахтарын өйүүргэ киллэрэр кылааккытын тоһоҕолоон бэлиэтиибин. Биисинэс бэрэстэбиитэллэрэ байыаннай дьайыы кыттыылаахтарыгар уонна кинилэр дьиэ кэргэттэригэр көмөлөһөллөр,”Саха сирэ эһигинниин!” уопсастыбаннай баҕа өттүнэн штабы күүскэ өйүүллэр.  Эрэгийиэҥҥэ дьоҕус уонна орто урбаан 8 субъега байыаннай дьайыыга анал бородууксуйаны,ол иһигэр обмундированиены, сэби-сэбиргэли, оһохтору уонна вездеходтары  оҥорон таһаарар тэрилтэлэр реестрдэригэр киирдэ.

Бу күн эһиги көҕүлээһиҥҥит, дьулуургут, кэскиллээҕи таба көрүүгүт иһин махтанабыт.

Уопсай күүһүнэн-кыаҕынан бары ыарахаттары туоруохпут уонна эрэгийиэммит тирэхтээх сайдыытын хааччыйыахпыт диэн эрэнэбин. Эһиэхэ хорсун быһаарыныылары, саҥа идиэйэлэри уонна сарсыҥҥы күҥҥэ эрэли баҕарабын!

Бырааһынньыгынан, күндү урбаанньыттар! Эһиги дьыалаҕыт туруктаах дохуоту уонна дьоһун билиниини аҕаллын, оттон Саха сирэ эһиги дьулуургут көмөтүнэн салгыы чэчирии сайыннын.

Саха Өрөспүүбүлүкэтин Ил Дархана Айсен Николаев