Ил Дархан Энэргиэтик күнүнэн эҕэрдэлээтэ

Бүгүн Энэргиэтик күнэ бэлиэтэнэр. Бу бэлиэ күнүнэн Ил Дархан Айсен Николаев энэргэтиичэскэй тиһик үлэһиттэрин, бэтэрээннэрин эҕэрдэлээтэ.

— Саха сирин тыйыс тымныы усулуобуйатыгар,   -60 кыраадыстаах тымныыга тиһигин быспакка  эниэргийэнэн хааччыллыы  олохпутугар улахан суолталаах.  Эһиги быһаччы үлэҕититтэн өрөспүүбүлүкэ хас биирдии олохтооҕун этэҥҥэ олоруута тутулуктаах.

Саха сирин энэргэтиичэскэй тиһигэ Уһук Илиҥҥэ саамай улахан. Бу —  Бүлүүтээҕи ГЭС каскада, Дьокуускайдааҕы ГРЭС, Дьокуускайдааҕы ТЭЦ, сүүһүнэн  дизельнэй электростанциялар, уонунан тыһыынча   килэмиэтир уот ситимнэрэ.

Билигин биэс улахан бырайыагы, ол иһигэр Ленскэйгэ  Новоленскайдааҕы ТЭС, Чульмаҥҥа  Южно-Якутскай ТЭС, Нерюнгритааҕы  ГРЭС улаатыннарыы, Дьокуускайдааҕы  ГРЭС иккис уочаратын, Уус Куйгаҕа дьоҕус кыамталаах  атомной станцияны тутуу үлэлэрэ ыытыллар.

Маннык улахан бырайыактар ааспыт үйэ 90-с сылларыттан ыытылла иликтэр. Бу бырайыактар үлэҕэ киирдэхтэринэ бастатан туран,   энэргэтиичэскэй куттал суох буолуутун хааччыйыахтара,  1000-тан тахса үрдүк хамнастаах үлэ миэстэтин таһаарыахтара, — диэн Ил Дархан эҕэрдэтигэр этэн туран салаа үлэһиттэригэр доруобуйаны, этэҥҥэ буолууну баҕарда.

Санатан эттэххэ, быйыл РФ Бэрэсидьиэнэ Владимир Путин Госсэбиэт «Энэргиэтикэ» салаатын хамыыһыйатын бэрэссэдээтэлинэн Айсен Николаев анаабыта.