Ил Дархан Эпос уонна ускуустуба Арктикатааҕы киинин эбийиэгэр сырытта
![](https://sakha-sire.ru/wp-content/uploads/2024/07/epos2-1060x596.jpeg)
Ил Дархан Айсен Николаев Уһук Илиҥҥэ суох бөдөҥ култуурунай кластеры — Эпос уонна ускуустуба Арктикатааҕы киинин тутуу хайдах баран иһэрин бэрэбиэркэлээтэ. От ыйын 12 күнүгэр кини эбийиэги сыныйан көрдө уонна хас да хайысханан үлэни түргэтэтэргэ соруйда.
“Эбийиэк тутулуннаҕына филармония уонна Олоҥхо тыйаатыра Уһук Илиҥҥэ да, Сибииргэ да суох кэнсиэртиир саалаланыахтара. Эбийиэк бэлэм буолара чугаһаабыт, инженернэй үлэлэр саҕаламмыттар. Эһиил өрөспүүбүлүкэ култууратыгар улахан суолталаах эбийиэк үлэтин саҕалыырын курдук хас да хайысханан түргэтиир наада”, — диэтэ эрэгийиэн Баһылыга.
![](https://sakha-sire.ru/wp-content/uploads/2024/07/epos1.jpeg)
![](https://sakha-sire.ru/wp-content/uploads/2024/07/epos5.jpeg)
![](https://sakha-sire.ru/wp-content/uploads/2024/07/epos3.jpeg)
![](https://sakha-sire.ru/wp-content/uploads/2024/07/epos4.jpeg)
“Ирбэт тоҥҥо маннык улахан тутуу маннык ураты оборудованиелаах өссө тутулла илигэ. Саха сиринээҕи култуурунай кластер Арассыыйа саамай ураты тутууларын кытта биир кэккэҕэ туруо уонна өрөспүүбүлүкэ дьиҥнээх визитнэй карточкатынан буолуо”, — диэтэ тутууну ыытар “ВИС” бөлөх генеральнай дириэктэрэ Сергей Юдин.
Бүгүҥҥү күннээххэ 33 тыһ. кв.м. иэннээх дьиэ каркааһа бүппүт, 25 тыһ. кубометр бетон кутуллубут. Билигин дьиэ иһигэр ис быыстары туруора, хара оҥоһуутун, сылаас муостаны оҥоро сылдьаллар. Хампаанньа бэрэстэбиитэлэ эппитинэн, тутуу былаһааккатыгар 154 киһи, 11 анал тиэхиньикэ үлэлиир, кэлэр нэдиэлэттэн 200-тэн тахса киһини эбии ылар былааннаахтар, сүрүннээн өрөспүүбүлүкэ бэйэтин тутааччыларын.
Эбийиэги көрөн баран, Айсен Николаев саала акустиката хаачыстыбалаах буоларыгар кыһаллан болҕомтоҕутун ууруҥ, күөлү ыраастааҥ, чугастааҕы сирдэри тупсаҕай оҥоруҥ диэн сорудахтаата. Кластер тулатыгар 15 тыһ.кв.м. сир тупсарыллыа, ландшафтнай дизайннаах, газоннаах, сибэккилээх күүлэйдиир сирдэр оҥоһуллуохтара. 177 миэстэлээх массыына тохтуур сирэ баар буолуо.
Арктическай киин эһиил 2025 сылга үлэҕэ киириэхтээх. Саҥа кластер Саха сирин норуоттарын эпическэй нэһилиэстибэлэрин чөл тутан хаалларар киининэн, ону таһынан айар кэлэктииптэргэ аналлаах былаһаакканан буолуоҕа диэн иһитиннэрэр СӨ Ил Дарханын уонна Бырабыыталыстыбатын пресс-сулууспата.
Сообщить об опечатке
Текст, который будет отправлен нашим редакторам: