Ил Дархан Эпос уонна ускуустуба Арктикатааҕы киинин тутуу хаамыытын бэрэбиэркэлээтэ

Ил Дархан Айсен Николаев нэдиэлэ бастакы күнүгэр Уһук Илиҥҥэ саамай бөдөҥ култуура кластерын – Дьокуускайга Эпос уонна ускуустуба Арктикатааҕы киинин тутуу хаамыытын бэрэбиэркэлээтэ.

Өрөспүүбүлүкэ баһылыга бастакы тымныылар түһүөхтэрин иннинэ эбийиэк тас өттүн бүрүйэргэ сорудахтаата. Бу туһунан СӨ Ил Дарханын уонна Бырабыыталыстыбатын пресс-сулууспата суруйар.

Айсен Николаев бу тутуллар саҥа киин  өрөспүүбүлүкэҕэ култуурунай, социальнай уонна креативнай эйгэтин сайыннарыыга биир улахан инфраструктуралаах тутаах эбийиэгэ буоларын бэлиэтээтэ. «Киһини сөхтөрөр тутуу ыытыллар. Былаан быһыытынан бастакы тымныылар түһүөхтэрин иннинэ тас өттө бүрүллүөхтээх уонна эһиил сыл бастакы аҥаарыгар эбийиэк толору тутуллуохтаах. Бу киин Саха сиригэр эрэ буолбакка, бүтүн Уһук Илиҥҥэ уонна Сибииргэ ханна да суох ураты култуурунай эбийиэгинэн буолуохтаах», — диэн бэлиэтээн эттэ. Билигин манна эбийиэк ис өттө уонна  инженернэй коммуникациялары оҥоруу үлэлэрэ ыытыллаллар. Дьиэ тас өттө 80%-на хомуллубут. «ПФ» «ВИС» ХЭУо Саха сиринээҕи бырайыактарын территориальнай управлениетын  дириэктэрэ Владимир Наханьков иһитиннэрбитинэн, оттук сезона саҕаланыытыгар дьиэ тас өттө уонна үрдүн оҥоруу үлэтэ түмүктэниэхтээх. Ол кэнниттэн тутааччылар дьиэ ис өттүгэр киирэллэр.

Арктикатааҕы киини тутуу үлэтэ Саха сирин Бырабыыталыстыбатын уонна «ВИС» бөлөх икки ардыларыгар түһэрсиллибит чааһынай партнерство туһунан сөбүлэһии чэрчитинэн ыытыллар.