Ил Дархан граныгар сайаапкалары ылыы саҕаланна

2024 сылга Ил Дархан граннарын аныырга 16 социальнай суолталаах хайысхалар бигэргэммиттэрэ.

Быйыл грант уопсай суумата 102 мөл. солк. тахса. Сайаапканы ылыы кулун тутар 25 күнүттэн муус устар 23 күнүгэр диэри ыытыллар. Бу туһунан СӨ Ыччат дьыалаларыгар уонна социальнай коммуникацияларга министиэристибэтэ иһитиннэрэр. Куонкуруска араас эйгэттэн барыта 45 эспиэр, ону сэргэ  бырайыактары сыаналааһыҥҥа федеральнай таһымнаах эспиэр кыттыахтара.

Грант хайысхаларын ортолоругар ыччат бэлиитикэтэ, патриотическай иитии, волонтердааһын, дьиэ кэргэни уонна оҕону иитиини өйөөһүн, тыл сайдыыта, о.д.а. бааллар.

Санаттахха, ааспыт сылга Ил Дархан граныгар куонкуруска барыта 414 сайаапка киирбитэ, олортон 71 бырайыак 117 мөл. солк. тахса сууманы ылбыта.

Куонкурус туһунан иһитиннэрии уонна ирдэнэр докумуоннар https://grants.yakutia.click цифровой аналитическай платформаҕа, ону тэҥэ Ыччат дьыалаларыгар министиэристибэ https://minmol.sakha.gov.ru/ саайтыгар тахсыбыттара.

Куонкурус түмүгэ бэс ыйын 15 күнүгэр диэри биллиэҕэ. Бырайыактары олоххо киллэриигэ кыайыылаахтар от ыйын 1 күнүттэн үлэлэрин саҕалыахтарын сөп.