Ил Дархан халаантан эмсэҕэлээбиттэргэ үбүнэн-харчынан көмө төлөбүрүн түргэтэтэргэ сорудахтаата

Ил Дархан Айсен Николаев ыксаллаах быһыыны-майгыны сэрэтиигэ уонна туоратыыга, баһаартан куттала суох буолууну хааччыйыыга хамыыһыйа мунньаҕын ыытта.

Бастакы уочарат соругунан халаантан эмсэҕэлээбиттэргэ үбүнэн көмөнү төлөөһүнү саҕалааһын буолар. Ону сэргэ саахал кэнниттэн чөлүгэр түһэрии үлэлэрин тэрийиигэ улахан болҕомто ууруллар.

«От ыйын 18 күнүгэр мин ыйаахпынан Абый уонна Өймөкөөн улуустарыгар нэһилиэнньэлээх пууннар ууга барбыттарынан сибээстээн, эрэгийиэннээҕи таһымнаах ыксаллаах быһыы-майгы эрэсиимэ киллэриллибитэ. Бүгүҥҥү күҥҥэ нэһилиэнньэлээх пууннар ууттан толору босхолоннулар. Ол да буоллар, балаһыанньа уустук — уу таһыма хамсыан сөп. Саамай сүрүнэ — биһиги төһө кыалларынан түргэнник чөлүгэр түһэрии үлэлэригэр турунуохтаахпыт, эмсэҕэлээбиттэргэ өйөбүл миэрэлэрин ылынан олоххо киллэриэхтээхпит, бары үлэни уонна эмсэҕэлээбит дьоҥҥо көмөнү дьүөрэлиэхтээхпит», — диэн Айсен Николаев бэлиэтээтэ.

Өрөспүүбүлүкэ баһылыга эмсэҕэлээбиттэргэ үбүнэн-харчынан көмөнү ыытыы бастакы уочараттаах сорук буоларын эттэ. «Үгүс киһи баайын-дуолун сүтэрдэ, элбэх дьиэҕэ алдьаныы таҕыста. Нэһилиэнньэлээх пууннарга тырааныспар сырыыта суох, онон, биллэн турар, манна биһиги көмөбүт тустаах буолуохтаах. Бастакы нүөмэрдээх сорук — эмсэҕэлээбиттэргэ үбүнэн-харчынан көмөнү төлөөһүнү саҕалааһын. Сайабылыанньалар номнуо киирдилэр, бу үлэни уһун бюрократическай моһоллоро суох саҕалыахха наада — дьон харчыны номнуо ылан барыахтаахтар. Салгыы олохтоох салайыныы уонна толорор былаас уорганнарын соруга — хас биирдии эбийиэк хоромньутун төһө кыалларынан түргэнник сыаналаан, чөлүгэр түһэриигэ турунуу», — диэн Айсен Николаев эттэ.

Бастакы дааннайдарынан, Өймөкөөн улууһугар 137 олорор дьиэ алдьаммыт, ол иһигэр 10 чааһынай дьиэ мэлийбит. Муома улууһугар ууга барыы зонатыгар 123 киһи хабыллыбыт, эмсэҕэлээбит олорор дьиэ ахсаана — 4 дьиэ. Бүгүҥҥү күҥҥэ ФГИС судаарыстыбаннай өҥөлөрүн платформатын нөҥүө Өймөкөөн улууһун олохтоохторуттан 758 сайабылыанньа киирдэ. Онтон 555 сайабылыанньа — биир кэмнээх материальнай көмөнү оҥорууга, 203 — ыксаллаах быһыы-майгы түмүгэр бастакы наадалаах баайы-дуолу сүтэрбитинэн сибээстээн кэмпэнсээссийэни ылыыга.

Айсен Николаев дьиэни түргэнник өрөмүөннээһин боппуруоһугар ураты болҕомтотун уурда: «Тутуу матырыйаалларын аҕалыахха, дьиэлэри чөлүгэр түһэриигэ харчыны тыырыахха уонна онно баар биригээдэлэр көмөлөрүнэн наадалаах үлэлэри түргэнник ыытар наадалаах дии саныыбын». Көмөнү оҥорууга күүһү-уоҕу дьүөрэлиир сыалтан түөлбэлэри уонна муниципальнай тэриллиилэри кытта үлэ саҕаланна. Гуманитарнай көмөнү хомуйуу Дьокуускай куоракка Бестужев-Марлинскай уул., 5, ДОСААФ дьиэтигэр ыытыллар. 14 муниципальнай оройуонтан уонна Хотугулуу-Илиҥҥи федеральнай университетан тутуу биригээдэлэрэ — уопсайа 162 киһи тэрилиннилэр. Сунтаар улууһуттан бастакы биригээдэ от ыйын 23 күнүгэр номнуо айаннаата. Биригээдэлэр бэйэлэрин тырааныспардарынан наадалаах үлэлэрин сэбин-сэбиргэлин уонна ас-үөл саппааһын илдьэ айанныыллар.

«Муниципальнай тэриллиилэр, оройуоннар дьоҥҥо көмөлөһөр баҕаларын биллэрдилэр. Мин кинилэргэ  махтанабын уонна тоһоҕолоон бэлиэтиибин: исписэлиистэр тиийэн, көмөлөһөн барыыларын саҕалыылларын курдук, күүһү төһө кыалларынан түмэр наада. Ону таһынан гуманитарнай көмөнү учуоттуур уонна үллэрэр үлэни систиэмэлээхтик тэрийэргитигэр көрдөһөбүн. Үгүстэр көмөнү хомуйаллар уонна ыыталлар. Туох бэриллэрэ барыта бэлиэтэниэхтээх, көмө кимиэхэ саамай наадалаахха тиийиэхтээх. Улуус баһылыктара итини хааччыйыахтаахтар», — диэн өрөспүүбүлүкэ баһылыга эбэн эттэ. Ону тэҥэ Айсен Николаев Муома улууһугар үлэ ситиһиилээхтик тэриллибитин бэлиэтээтэ: «Сөпкө тэриллибит үлэ, ол иһигэр нэһилиэнньэлээх пууннар таһымнарыгар, улууска бу ыар тургутууну улахан содула суох аһарарыгар кыаҕы биэрдэ».