Ил Дархан Харыйатыгар 700 оҕо кыттар

Сыллата Ил Дархан Харыйатыгар Саха сирин бары улуустарыттан, куорат уокуруктарыттан, талааннаах оҕолору булар, өйүүр өрөспүүбүлүкэ, дойду, аан дойду күөн күрэстэрин, олмипиадаларын, кэмпириэнсийэлэрин кыайыылаахтарынан буолбут 8-11 кылаас 700 үөрэнээччитэ ыҥырыллар.

Ил Дархан быйылгы Харыйата ахсынньы 19-20 күннэригэр буолар. Үөрэх уонна билим миниистирэ Нюргуна Соколова салайааччылаах тэрийээччилэр, кыттааччыларга анаан бэрт сэргэх бырагырааматын толкуйдаабыттар. Бу күннэргэ оҕолорго анаан аралдьытар тэрээһиннэри ыытыахтара, Саҥа дьыллааҕы маастар-кылаастары оҥоруохтара. Ол курдук, ахсынньы 19 күнүгэр үгэскэ кубулуйбут киэҥ далааһыннаах тэрээһин – “Биһиги – Арассыыйа кэскилэбит” оҕолор гражданскай пуорумнара ыытыллыаҕа. Ил Дархан Харыйатын саамай сүрүн тэрээһинэ Марфа уонна Сергей Расторгуевтар ааттарынан цииркэҕэ буолуоҕа. Манна умсугутуулаах маастар-кылаастары былааннаабыттар:  Дьокуускайдааҕы өҥө технологическай тиэхиньикума бирээнньик оонньууру, Дьокуускайдааҕы култуура уонна ускуустубата кэллиэһэ харыйа оонньуурун оҥорууга маастар-кылаастара тэриллиэҕэ, пилота суох көтөр аппарааты көтүтүөхтэрэ, дроннары көрдөрүөхтэрэ, уо.д.а. интэриэһинэй бырагыраамалары толкуйдаабыттар.

Санатан эттэххэ, бары кыттааччыларга “СӨ үөрэҕи сайыннарыы” судаарыстыбаннай бырагырааматын иитинэн 25 000 солк. суумалаах биир кэмнээх истипиэндьийэни туттараллар.