Ил Дархан Харыйатыгар бастыҥ үөрэнээччилэри чиэстээтилэр

Бүгүн, ахсынньы 20 күнүгэр, Дьокуускай куоракка өрөспүүбүлүкэ бары муниципальнай оройуоннарыттан уонна куорат уокуруктарыттан 8-11 кылаас дьоҕурдаах үөрэнээччилэрин түмэр, үгэс буолбут Ил Дархан Харыйата буолла. Тэрээһин үгэс быһыытынан Марфа уонна Сергей Расторгуевтар ааттарынан судаарыстыбаннай циркэҕэ ыытылынна.

Харыйа кыттыылаахтарынан үөрэххэ, наукаҕа, айар үлэҕэ уонна успуорка үрдүк ситиһиилэммит, дьоҕурдаах оҕолору булууга уонна өйөөһүҥҥэ туһуламмыт эрэгийиэннээҕи куонкурустар кыайыылаахтара уонна призердара буоллулар.

СӨ Ил Дархана Айсен Николаев бырааһынньыкка  өйдөөх, доруобай, күүстээх оҕолору көрөрүттэн өрөспүүбүлүкэ кэлэр кэскилигэр улаханнык эрэлэ күүһүрэрин туһунан санаатын үллэһиннэ. «Мин, Саха сирин бары олохтоохторун курдук, эһигинэн, биһиги оҕолорбутунан, ис сүрэхпиттэн киэн туттабын. Эһиги биһигиттэн хайаан да ордук буолуоххут диэн итэҕэйэбин», – диэтэ Ил Дархан Айсен Николаев. Тэрээһин чэрчитинэн өрөспүүбүлүкэ бастыҥ үөрэнээччилэрин, ол иһигэр уон стипендиаты, чиэстээһин буолла.

«Быйыл биһиэхэ Бүтүн Арассыыйатааҕы олимпиадалар кыайыылаахтара элбээбиттэриттэн олус үөрэбин. 16 сыл устата маннык элбэх кыайыылаах уонна призер суоҕа. Оҕолорбут математикаҕа, информатикаҕа уонна физикаҕа биир кэлим судаарыстыбаннай эксээмэни туттарыылара тубуспутуттан үөрэбин», – диэн эрэгийиэн баһылыга бэлиэтээтэ. Кини оҕолорго Саха сиригэр үчүгэй буоларын туһугар барыта оҥоһулларын туһунан кэпсээтэ.

«Биһиги дойдубутугар кэрэ үөрэх эбийиэктэрэ, ону таһынан култуура, успуорт элбэх аныгы эбийиэктэрэ тутуллаллар. Бу барыта эһиги элбэх билиини ыларга, Ийэ дойдугут патриоттара буоларга уонна таптыырга үөрэнэргит туһугар оҥоһуллар», – диэн Айсен Николаев санаатын үллэһиннэ.

Быйыл Ил Дархан Харыйатын тэрээһиннэрэ «Саха сирин сүрэҕэр – Арассыыйа сүрэҕэр» дэбиистээх ыытылыннылар уонна Саха Өрөспүүбүлүкэтигэр Ийэ дойду көмүскээччитин сылыгар ананнылар.

Бырааһынньыктааҕы бырагыраама чэрчитинэн Ил Дархан Харыйатын кыттыылаахтара нуучча уонна хотугу норуоттар остуоруйаларын матыыбынан туруоруллубут «Дьикти кинигэлэр» диэн Саҥа дьыллааҕы цирк көрдөрүүтүгэр сырыттылар. Туруоруу сюжета Кощей Хаарчаананы уоруутун уонна Саҥа дьылы төнүннэрээри көрдүү барар Ваня уол доҕорун Бөрөнү кытта айаннарын тула тутуллубут. Туруорууга норуот фольклорун персонажтара, ол иһигэр Баба Яга, Емеля, Жар-птица, Змей Горыныч, Леший уобарастара көрдөрүлүннүлэр.

Ил Дархан стипендиаттарынан уон оскуола үөрэнээччитэ буолла:

1. Максим Максимов, Дьокуускайдааҕы кадетскай оскуола 11-с кылааһын үөрэнээччитэ;
2. Эйнара Таркова, Аксения уонна Наталья Посельскайдар ааттарынан Дьокуускайдааҕы балетнай оскуола 10-с кылааһын үөрэнээччитэ;
3. Лю Цзелун, Арктическай оскуола 11-с кылааһын үөрэнээччитэ;
4. Дарина Стручкова, Алексей Кралин аатынан Абаҕа орто оскуолатын 11-с кылааһын үөрэнээччитэ;
5. Павел Пивоваров, Иван Тимофеев аатынан Майа лиссиэйин 11-с кылааһын үөрэнээччитэ;
6. Юлия Ганяк, Нерюнгри куорат Михаил Кочнев аатынан 1 №-дээх орто оскуолатын 11-с кылааһын үөрэнээччитэ;
7. Саян Иванов, Владимир Ларионов аатынан физико-тэхиниичэскэй лицей 10-с кылааһын үөрэнээччитэ;
8. Александра Гребенникова, Алдан оройуонун Нижнэй Кураанах бөһүөлэгин гимназиятын 11-с кылааһын үөрэнээччитэ;
9. Виорел Макария, Өрөспүүбүлүкэтээҕи анал оскуола-интэринээт 10-с кылааһын үөрэнээччитэ;
10. Александра Рожина, Дмитрий Коркин аатынан олимпийскай эрэл кэскиллээх Чурапчытааҕы спортивнай орто оскуола-интэринээтин 11-с кылааһын үөрэнээччитэ.