Ил Дархан хорсун байыаска саха быһаҕын бэлэхтээтэ

Ил Дархан Айсен Николаев «Тута» диэн ааттаммыт, байыаннай дьайыыга хорсун быһыыны көрдөрбүт байыаһы кытта көрүстэ.

Байыас кыргыһыы күүрээннээх күннэрин туһунан кэпсээтэ. Аан дойду үрдүнэн видеота тарҕаммыт кырыктаах кыргыһыы кэнниттэн, кини өстөөх тыылыгар хас да күн хаалан, соҕотоҕун утары киирсибит, бронетехниканы, сэрии сэптээх ыскылааттары дэлби тэптэрбит. Ол эрэ кэнниттэн бэйэтин дьонугар төннүбүт.

— Кини бэрт сэмэй саха уола, бэйэтин дьоруой курдук санаммат. Ити видео тарҕамматаҕа буоллар, кини хорсун быһыытын туһунан ким да билиэ суох этэ, Андрей бэйэтэ кимиэхэ да сиһилии кэпсээбэтэх. Кини курдук дьон улуу Арассыыйаны күүстээх, ньыгыл кытаанах оҥороллор. Бу көрсүһүү кэмигэр мин саха буойуннарынан киэн туттуум өссө күүһүрбүтэ, — диэн Айсен Николаев телеграм-ханаалыгар суруйда.