Ил Дархан ийэ тыл боппуруоһугар болҕомтону туһаайда  

“Бүгүҥҥү күҥҥэ сахалыы саҥарбат оҕо элбээн иһэрэ кистэл буолбатах. Бу урукку курдук Дьокуускай куорат эрэ кыһалҕата буолбатах, бу кыһалҕа сэлиэнньэлэргэ быһаччы көстөр. Оннооҕор өссө аҕыйах оҕо төрүт олохтоох аҕыйах ахсааннаах норуоттар тылларын билэр. Нуучча тылын чаҕылхайдык билэллэр диир эмиэ кыаллыбат, ордук кырамаатыка өртүгэр” – диэн Ил Дархан эттэ.

Бастакы көрүүгэ көрдөрүү куһаҕана суох курдук, сахалыы кылаас эбиллэрин, үөрэх босуобуйалара тахсалларын, үөрэх платформата оҥоһуллубутун иһитиннэрдэ. “Ол эрээри, бу ылыллыбыт ситиһиинэн хаалан хаалар хайдах да табыллыбат” – диэн эттэ.

Ыам ыйын 17 күнүгэр Бырабыыталыстыба саха тылын, литэрэтиирэтин, култууратын үөрэтии кэнсиэпсийэтин бигэргэппитин санатта. “Кэнсиэпсийэ саҥа көрүүлэрэ статистика, отчуот эрэ туһугар толоруллуо суохтаах. Уһуйааннарга, оскуолаларга этнокултуурунай эйгэни тэрийиини, төрөөбүт тыл туттуллар эйгэтин кэҥэтиллиитин өйүөхтээхпит. Үөрэх эйгэтэ төрөөбүт тылларынан креативнай контент сакаасчытынан буолуохтаах” – диэн ыйда. Бу инниттэн литератордары, театр, киинэ холбоһуктарын, о.д.а. кытта ыкса үлэлэһэр ирдэнэрин эттэ.