Ил Дархан  Ил Түмэн спикерин кытары көрүстэ

Алтынньы 18 күнүгэр Саха Өрөспүүбүлүкэтин Ил Дархана Айсен Николаев уонна СӨ Судаарыстыбаннай Мунньаҕын (Ил Түмэн) бэрэссэдээтэлэ Алексей Еремеев парламент  күһүҥҥү бастакы пленарнай мунньаҕар бэлэмнэнии боппуруостарын дьүүллэстилэр.

Көрсүһүүгэ 2025 сылга өрөспүүбүлүкэ бүддьүөтүн туһунан сокуон бырайыагын уонна 2026-2027 сыллардааҕы былааннары кэпсэттилэр.

Өрүттэр судаарыстыбаннай бүддьүөт социальнай хайысхата  дьоһун суолталааҕынан хааларыгар биир санааҕа кэллилэр. Холобур,  Бэрэсидьиэн көҕүлээбит национальнай бырайыактарын хос үбүлээһин боппуруоһа.

Салайааччылар ону таһынан тыа хаһаайыстыбатын судаарыстыба  үбүлээһинин  кээмэйин  2024 сыллааҕы кээмэйиттэн аҕыйаппат туһунан сүбэлэстилэр. Онуоха бүддьүөт чопчуламмыт сыыппараларыттан көрөн,  бу суума эбиллиэн сөп.