Ил Дархан коррупцияны утары охсуһар үлэни иилээн ыытар хамыыһыйа мунньаҕын ыытта

Мунньахха коррупционнай буруйу оҥорууну утары охсуһууга туһуламмыт үлэ түмүктэрэ уонна 2021-2024 сылларга өрөспүүбүлүкэҕэ коррупцияны утары оҥоһуллубут былаан олоххо киириитин көрдүлэр.

Өрөспүүбүлүкэ баһылыга быраабы араҥаччылыыр уонна хонтуруоллуур уорганнарга бииргэ үлэлииллэрин иһин махтанна.

“2021-2024 сылларга коррупцияны утары оҥоһуллубут үлэ былаана түмүктэннэ. Өрөспүүбүлүкэҕэ үүнэр көлүөнэни, ыччаты уонна урбаанньыттары кытта эмиэ систиэмэлээх профилактическай үлэ ыытылынна», — диэн бэлиэтээтэ Айсен Николаев.

Өрөспүүбүлүкэ борокуруора Максим Попов салалтатынан коррупцияны утары охсуһар биэдэмистибэлэр икки ардыларынааҕы оробуочай бөлөх элбэх тэрээһини өрөспүүбүлүкэҕэ олоххо киллэрдэ. Эрэгийиэҥҥэ быраабы араҥаччылыыр уорганнар ситимнээхтик бииргэ үлэлииллэринэн, коррупционнай буруйу оҥоруу бобулларыгар үчүгэй хамсааһын баар. Ону кэнники биэс сыл устата ыытыллыбыт үлэни ырытыы түмүгэ бигэргэтэр.

Өрөспүүбүлүкэҕэ 2021-2024 сылларга коррупцияны утары былаан пууннарын олоххо киллэрии РФ Бэрэсидьиэнэ бигэргэппит Коррупцияны утары охсуһар национальнай былааныгар ыйыллыбыт миэрэлэри олоххо киллэрии чэрчитинэн ыытылынна. Бу докумуону олоххо киллэрии сүрүн соругунан өрөспүүбүлүкэҕэ коррупцияны сэрэтии буолар. Былаан олоххо киириитин чэрчитинэн, эрэгийиэҥҥэ коррупцияны утары сэминээрдэр, пуорумнар уонна үөрэтэр куурустар ыытылыннылар.

“Коррупцияны сэрэтэр уонна утары охсуһар саҥа ньымалары тобулан иһиэххэ наада. Мөлтөх өрүттэри булан, бөҕөргөтөн иһэр улахан суолталаах», — диэтэ Айсен Николаев.

Мунньахха өрөспүүбүлүкэ баһылыга хоруупсуйаны көдьүүстээхтик сэрэтии уопсастыба уонна былаас бары уорганнара бииргэ үлэлээһиннэринэн эрэ ситиһиллэр кыахтааҕын тоһоҕолоон бэлиэтээтэ.диэн иһитиннэрэр Ил Дархан, бырабыыталыстыба пресс-сулууспата.