Ил Дархан Кыайыы 80 сылынан мэтээли тыыл бэтэрээнигэр туттарда

СӨ Ил Дархана Айсен Николаев Үөһээ Бүлүүгэ үлэтинэн бара сылдьан, «1941-1945 сс. Аҕа дойду Улуу сэриитигэр Кыайыы 80 сыла» мэтээли тыыл, үлэ бэтэрээнигэр Дмитрий Николаевич Сибиряковка туттарда.

«Быйыл дойду бүттүүнэ Улуу Кыайыы 80 сылын бэлиэтиир. Сэрии, тыыл бэтэрээннэрин, сэрии сылларын оҕолорун ахтыылара ыччаттарбыт Аҕа дойду уоттаах сэриитин туһунан билэллэригэр олус наада. Биһиги кыайыы туһугар ытык кырдьаҕастарбыт, аҕа саастаах көлүөнэбит хорсун быһыыларын сыаналыыбыт, историябытынан киэн туттабыт«, — диэн этэр Ил Дархан.

Айсен Николаев тыыл, үлэ бэтэрээнигэр Дмитрий Николаевич Сибиряковка доруобуйаны, дьоллоох олоҕу баҕарда.

Дмитрий Николаевич уолун дьиэ кэргэнин кытта 2024 сыллаахха сэтинньигэ 98 кв.м. иэннээх 4 хостоох дьиэҕэ көспүт. Бу хаарбах, саахалланар туруктаах дьиэттэн дьону көһөрүү бырагырааматынан.

Бэтэрээн уола Петр Дмитриевич Сибиряков аҕата этэҥҥэ сылдьарын, Улуу Кыайыы 80 сылын көрсөөрү бэлэмнэнэрин этэр.

Ыам ыйыгар 95 сааһын туолбут Дмитрий Николаевич Саха АССР Чурапчы оройуонун Одьулуун сэлиэнньэтигэр төрөөбүт. Аҕа дойду кырыктаах сэриитин сылларыгар төрөппүттэрэ өлбүттэр, кини оҕо дьиэтигэр иитиллибит.

1953 сыллаахха Булуҥ оройуонугар моториһынан үлэлии барбыт. 1956 сыллаахха комсомол путевкатынан «Арктика» колхуоска балыксыттаабыт. 1960 с. Дьокуускайга «Якутстройтрест» тэрилтэҕэ монтажниктаабыт. 1963 сыллаахха Покровскайга стройучаастакка үлэлээбит, салгыы Үөһээ Бүлүүгэ барбыт. Бочуоттаах сынньалаҥҥа 1996 сыллаахха тахсыбыт. Тыыл уонна үлэ бэтэрээнэ Дмитрий Николаевич дьаныардаах үлэтинэн СӨ үтүөлээх тутааччыта буолбут уонна Үөһээ Бүлүү Бочуоттаах гражданина диэн үрдүк ааты ылбыт.

Дмитрий Николаевич кэргэнинээн үс уолу төрөтөн, улаатыннаран, атахтарыгар туруорбуттар. Билигин кинилэр хардатын аҕаларыгар кыһамньыларын, болҕомтолорун уураллар.

Айсен Николаев Аҕа дойду сэриитин ыарахан сылларын туһунан билэр, өйдүүр-саныыр, фашизмы кыайбыт дьоҥҥо саамай харыстабыллаах уонна болҕомтолоох сыһыан наадатын, сэрии кэннинээҕи сылларга чөлүгэр түһэрии үлэлэригэр кыттыыларын үрдүктүк сыаналыыры бэлиэтээтэ. Көлүөнэттэн көлүөнэҕэ билиини-көрүүнү тиэрдии, ыччат аҕа көлүөнэ кыайыылаах үгэһин салгыырыгар кыаҕы биэрэрин эттэ.

СӨ Ил Дарханын уонна Бырабыыталыстыбатын пресс-сулууспата

Андрей Сорокин хаартыскаҕа түһэриитэ, СИА