Ил Дархан «Кыайыы дьыктааныгар» кытынна

Айсен Николаев «Кыайыы дьыктаана» норуоттар икки ардыларынааҕы аахсыйаҕа кытынна. Быйыл дьыктаан Арассыыйаҕа 30 тыһыынчаттан тахса былаһааккаҕа уонна  80 дойдуга ыытыллар. Саха сиригэр биир улахан былаһаакканан Жатайдааҕы 1 -кы №-дээх оскуола буолла. 

Оскуола үөрэнээччилэрэ дьыктааны өрөспүүбүлүкэ  аҕа баһылыгын кытта бииргэ суруйдулар. Кыттааччылар Аҕа дойду сэриитин уонна аан дойду иккис сэриитин түгэннэригэр сыһыаннаах 25 ыйытыыга 45 мүнүүтэ иһигэр хоруйдаатылар. Дьыктаан сорудахтарыгар байыаннай дьайыы туһунан ыйытыылар эмиэ киирдилэр.

“Кыайыы дьыктаана билиини бэрэбиэркэлээһин эрэ буолбатах, гражданскай өйдөбүнньүк суолталаах. Биһиги Аҕа дойду Улуу сэриитин туһунан кырдьыгы  кэлэр көлүөнэлэргэ тиэрдэр эбээһинэстээхпит. Оскуола оҕолоро тэрээһиҥҥэ көхтөөхтүк кытталлара ордук суолталаах – кинилэр дойдубут историческай өйдөбүнньүгүн харыстааччылара буолуохтара”, — диэн бэлиэтээтэ Айсен Николаев.

Дьыктаан кэнниттэн Ил Дархан үөрэнээччилэри, учууталлары кытта кэпсэттэ.  Киниэхэ саҥа дьиэҕэ, саҥа  технологиялар эйгэлэрин сүрүн эбийиэгэр экскурсия ыытылынна. Саҥа куорпус 360 үөрэнээччигэ анаммыт. Бу күн коллекторын уонна автономнай хочуолунайы туһанар соҕотох оскуола буолар. Эбийиэк Хоту сиргэ, Арктика усулуобуйатыгар анаммыт, Томскай учуонайдара оҥорбут энергияны харыстыыр ​​систиэмэлэринэн хааччыллыбыт.

Саҥа оскуола дьиэтэ СӨ бырабыыталыстыбатын уонна «ПроШкола» (VEB Group) концессияларын көмөтүнэн тутуллан, 2024 сыллаахха от ыйыгар үлэҕэ киирбитэ.

Санатан эттэххэ, «Кыайыы дьыктаана» норуоттар икки ардыларынааҕы историческай-патриотическай тэрээһин сэттис төгүлүн буолла.  Ол чэрчитинэн, Аҕа дойду Улуу сэриитин түгэннэрин туһунан ким баҕарар билиитин бэрэбиэркэлиэн сөп.

 2024 сыллаахха Саха сиригэр 43 тыһыынчаттан тахса киһи кыттыбыта. Быйыл өрөспүүбүлүкэ аэропортарын, полярнай ыстаансыйаларын, атомнай электро-ыстаансыйаларын уонна ньиэп платформаларын киллэрэн туран, барыта 907 былаһаакка  тэрилиннэ.

Ил Дархан, бырабыыталыстыба пресс-сулууспата.