Дьокуускайдааҕы мэдиссиинэ кэллиэһин устудьуоннара. 2019 сыл
Күндү миэдиктэр, доруобуйа харыстабылын бэтэрээннэрэ!
Саха Өрөспүүбүлүкэтин салалтатын уонна тус бэйэм ааппыттан эһигини идэлээх бырааһынньыккытынан – Мэдиссиинэ үлэһитин күнүнэн ис сүрэхпиттэн эҕэрдэлиибин!
Эһиги үлэҕит идэ таһымыттан үрдүк. Бу киһи анала — киһи доруобуйатын уонна олоҕун туһугар кыһамньыгыт. Эһиги күн аайы хас биирдии киһи доруобуйатын харыстыыгыт, ыарыылары, ыарахаттары ааһарга, олох үөрүүтүн төнүннэрэргэ көмөлөһөҕүт.
Саха Өрөспүүбүлүкэтэ доруобуйа харыстабылын эйгэтигэр үрдүк ситиһиилэри көрдөрөр. Уһук Илиҥҥэ олох уһуна саамай үрдүгүнэн биллэр – 72,94 сыл. Бу эһиги үлэҕит, кыһамньыгыт уонна үрдүк идэҕитигэр бэриниигит түмүгэ. Бүгүн өрөспүүбүлүкэ олохтоохторун 73%-нара үрдүк технологиялаах мэдиссиинэ көмөтүн Саха сирин тас өттүгэр барбакка эрэ туһаналлар.
Сүрэх-тымыр киинигэр 13 тыһыынчаттан тахса ыарыһах үрдүк технологиялаах көмөнү ылла, 600 киһи сүрэҕэ эпэрээссийэлэннэ. елекоммуникационнай технологиялар 582 быраас виртуальнай кэрийэн көрүүтүн ыытарга уонна 3 677 телемэдиссиинэ консультациятын тэрийэргэ кыаҕы биэрдилэр. Инфарктан уонна инсуултан өлүү-сүтүү аччыыр, тыһыынчанан ыапыһах сэрэтэр эмтэниини ылар.
Өрөспүүбүлүкэтээҕи онкологическай киин ааспыт сылга, 2024 сыл олунньутуттан үлэлээн, толору сыла туола илигинэ 42 тыһыынча ыарыһаҕы көрдө, 4 тыһыынчаттан тахса хирургическай эпэрээссийэ оҥоһулунна. Быраас-онкологтар поликлиникаҕа 52500 тахса консультацияны ыыттылар. Диагностика кыаҕа биллэрдик кэҥээтэ.
Биир саастарыгар диэри оҕолоох ыаллары тус бэйэ арыаллыыр «Мэдиссиинэ көмөлөһөөччүтэ» диэн саҥа инновационнай сервис киллэрилиннэ. Бырайыак саҕаламмытын кэннэ, Дьокуускай куоракка биир саастарыгар диэри 3190 оҕо уонна өрөспүүбүлүкэ оройуоннарыгар 1446 оҕо сэрэтэр көрүүлэри ааһалларын наадатын туһунан иһитиннэриини ыллылар.
Өрөспүүбүлүкэҕэ балыыһалар тутуллаллар уонна саҥардыллаллар. Быйыл биһиги уон балыыһа комплексын тутуутун түмүктүүбүт: Майа сэлиэнньэтигэр, Сангаар бөһүөлэгэр, Үөһээ Бүлүү улууһун Андреевскай сэлиэнньэтигэр, Бүлүүгэ, Намҥа, Ньурбаҕа эмтиир куорпустары, Аллараа Бэстээх бөһүөлэгэр учаастактааҕы балыыһаны, Амма сэлиэнньэтигэр биир симиэнэҕэ 200 киһини көрөр поликлиниканы, Дьокуускай куоракка 2 №-дээх куорат балыыһатын туталлар. Нерюнгри киин оройуоннааҕы балыыһатын дьахтар консультациятын дьиэтэ саҥардыллар. Сыл саҥатыгар Доруобуйа харыстабылын эрэгийиэннээҕи каадырдар киинэ арыллыбыта.
Хас биирдии Саха сирин олохтооҕор доруобуйа харыстабылын тиийимтиэ буолуутугар ураты болҕомто ууруллар. Өрөспүүбүлүкэтээҕи мобильнай биригээдэлэр кииннэрэ үлэтин географиятын кэҥэтэр, Арктика зонатыгар эрэ буолбакка, атын ыраах, уустук суоллаах оройуоннарга эмиэ мэдиссиинэ көмөтүн оҥороллор. Киин исписэлиистэрэ 18 оройуоҥҥа 62 тыһыынчаттан тахса киһини көрдүлэр. 2024 сыллаахха «Мобильнай хирургическай киин» бырайыак саҕаланна. Оройуоннааҕы балыыһалар баазаларыгар икки тыһыынчаттан тахса киһи көрүлүннэ уонна 600-кэ эпэрээссийэ оҥоһулунна. Оҕо мобильнай биригээдэтин састааба биллэ кэҥээтэ – билигин онно оҕо кардиолога, эндокринолога, психиатра уонна стоматолога киирэллэр.
Бу нэдиэлэҕэ өрөспүүбүлүкэ 13 оройуонугар оройуоннааҕы балыыһаларга 17 саҥа анал массыына бэрилиннэ. Федеральнай киин өйөбүлүнэн быйылгы бырагыраама (45 массыына) туолла. Кэлиҥҥи сылларга Саха сирин балыыһалара 376 саҥа массыынаны, ол иһигэр 92 суһал көмө массыынатын уонна 19 мобильнай көһө сылдьар комплексын ыллылар.
Анал байыаннай дьайыы зонатыгар идэтийбит уонна гражданскай иэстэрин толоро сылдьар дьоҥҥо, ону тэҥэ байыаннай сулууспалаахтары чөлүгэр түһэриигэ, кинилэр социальнай адаптацияларыгар үлэлиир дьоҥҥо анаан махтал тылларын тиэрдэбин.
Биһиги доруобуйа харыстабылын эйгэтигэр национальнай бырайыактары салгыыбыт: «Уһун уонна көхтөөх олох», «Дьиэ кэргэн», «Хас биирдии киһиэхэ – доруобуйа». Биһиги саха дьоно доруобай буолалларын туһугар барытын оҥоруохпут!
Күндү мэдиссиинэ үлэһиттэрэ, доруобуйа харыстабылын бэтэрээннэрэ!
Эһиэхэ бэйэни харыстаммакка үлэлииргит, тулуургут, амарах сыһыаҥҥыт иһин махтанабыт. Эһиги саха дьонун ытыктабылын, итэҕэлин ылыан ылаҕыт. Олоххутугар сырдык күннэр элбээтиннэр, дууһа сылааһа, доруобуйа, таптал уонна идэҕитигэр ситиһиилэр арыаллаатыннар! Мэдиссиинэ үлэһитин күнүнэн!
СӨ Ил Дархана Айсен Николаев
Ааҕааччы ыйытар: — Эмтэниигэ уонна эми-тому атыылаһыыга нолуоктан төннөрүүнү (вычет) бэйэҕэр, ойоххор (эргэр), төрөппүттэргэ, саастарын ситэ…
Саха сирин кэккэ оройуоннарыгар бэс ыйын 16-17 күннэригэр хаһыҥ түһэрэ күүтүллэр. Бу туһунан Саха сиринээҕи…
Бэс ыйын 14 күнүгэр Нам улууһун «Эҥсиэли» култуура уонна сынньалаҥ пааркатыгар улахан уйуктаах урбаанньыт суоппардар…
«AY YOLA» башкирдар бөлөхтөрө Саха сирин кэрэ миэстэлэринэн уһуллубут «Yola» диэн ырыа килиибин сүрэхтээтэ. Бу…
“Спортивные якутяне” үөрэнээччилэр өрөспүүбүлүкэтээҕи спартакиадаларын саамай маассабай, Арассыыйаҕа ханыыта суох күрэхтэһии диэн бэлиэтииллэрэ оруннаах. Быйылгы…
Бу күннэргэ Улан-Удэ куоракка эр дьоҥҥо боксаҕа Уһук Илиҥҥи чөмпүйэнээтин финальнай киирсиилэрэ түмүктэннилэр. Турнирга Саха…