Ил Дархан Михаил Николаев мемориалын бырайыагын оҥорууга куонкуруһу ыытар туһунан Ыйаахха илии баттаата

Саха сирин Ил Дархана Айсен Николаев Михаил Ефимович Николаев сырдык өйдөбүлүгэр мемориал бырайыагын оҥорууга архитектурнай-уус-уран аһаҕас куонкуруһу ыытар туһунан Ыйаахха илии баттаата.

Аһаҕас куонкуруһу ыытыыны Саха Өрөспүүбүлүкэтин Ил Дарханын иһинэн Архитектура уонна куораты тутуу управлениета тэрийэр. Куонкуруска монумент искусствотын уонна архитектуратын, куорат эйгэтин дизайнын билэр дэгиттэр дьон бэйэлэрэ эбэтэр айар бөлөх быһыытынан кыттыахтарын сөп.

Куонкурус үлэлэрэ тиэмэни арыйыахтаахтар, пааматынньык турар сирин кытта дьүөрэлэһиэхтээх, уһун үйэлээх буолуохтаах. Ону тэҥэ Михаил Ефимович Николаев киһи быһыытынан характеристикатыгар сөп түбэһиэхтээх.

Куонкуруска кыттар үлэлэри аһаҕас куонкуруһу ыытар туһунан иһитиннэриллибит күнтэн 60 хонук устата ыытыахха сөп.

Кыттааччылар үлэлэрин кумааҕы носителгэ уонна электроннай көрүҥүнэн туһааннаах суруктаах маннык аадырыска киллэрэллэр: Дьокуускай к., Аммосов уул., 8 дь., 202 кэб. уонна uaig_sakha@mail.ru