Ил Дархан Мииринэй оройуонун баһылыгын кытта көрүстэ

Ил Дархан Айсен Николаев Мииринэй оройуонун баһылыга Александр Басыровы кытта 2030 сылга диэри оройуон социальнай-экэнэмиичэскэй сайдыытын туһунан Ыйааҕы олоххо киллэриини дьүүллэстэ.

«Мииринэй оройуонугар доруобуйа, үөрэх уонна успуорт эйгэлэригэр сайдыы салҕанар. Өҥө оҥоруу хаачыстыбата тупсар, дьон олоҕун хаачыстыбата тупсан иһэр. Сотору Таас Үрэх сэлиэнньэтигэр Элбэх өҥөнү оҥорор култуурунай киин тутуутун саҕалыахпыт. Онно култуура дьиэтэ, бибилиэтиэкэ, буоста отделениета, актовай уонна успуорт саалалара киириэхтэрэ — тыа сиригэр көхтөөх уонна сынньанар эйгэ барыта тэриллиэҕэ», — диэн Айсен Николаев ТГ-ханаалыгар суруйар.

Ол курдук, Мииринэйгэ быйыл Оҕо дыбарыаһа уонна политехническай лиссиэйгэ успуорт саалата үлэҕэ киирэллэрэ былааннанар. Ону сэргэ мэдиссиинэ тэрилтэлэрин саҥардыыта, суоллар хапытаалынай өрөмүөнэ уонна социальнай эйгэни сайыннарыы былааннанар.