Ил Дархан Мииринэй улахан социальнай эбийиэктэрин тутуутун хаамыытын бэрэбиэркэлээтэ

Ил Дархан Айсен Николаев Мииринэй улууһугар сырыытын кэмигэр куорат улахан социальнай эбийиэктэрин тутуутун хаамыытын бэрэбиэркэлээтэ.

Ил Дархан Политиэхиньиичэскэй лиссиэй успуорка саалатын, 1-кы нүөмэрдээх оскуола, Оҕо дыбарыаһын уонна Мииринэйдээҕи улуус киин балыыһатын тутууларын көрдө.

Айсен Николаев тутулла турар эбийиэктэр Мииринэй олохтоохторугар уонна улуус инники сайдыытыгар улахан суолталаахтарын бэлиэтээтэ. Быйыл үлэҕэ киирэллэрин курдук үлэ үрдүк хаачыстыбалаахтык барарын кытаанахтык хонтуруоллааҥ диэн сорудахтаата.

Икки мэндиэмэннээх Политиэхиньиичэскэй лиссиэй успуорка саалатын уопсай иэнэ 2 тыһ.кв.м. тахса, РФ субъектарын экэнэмиичэскэй сайдыытын социальнай кииннэрин былаанын тэрээһинин олоххо киллэрии иитинэн, “Уһук Илин федеральнай уокуругун социальнай-экэнэмиичэскэй сайдыыта” судаарыстыбаннай бырагырааманан тутуллар.

Күн бүгүн тутааччылар сэндвич панели таҥаллар, көмө конструкциятын (опалубка) тирэҕин бэлэмнииллэр, этээстэр икки ардыларынааҕы сабыытын оҥороллор. Тутуу 68% бэлэм, быйыл кыраапык быһыытынан үлэҕэ киириэҕэ.

Успуорт саалатыгар универсальнай уонна оонньуур саалалар киирэллэр. Бу Мииринэй улууһун үөрэҕин эйгэтигэр, успуорт саамай аныгы тэрилинэн хааччыллыбыт  биир бөдөҥ спортивнай эбийиэгинэн буолуоҕа.

Ити тутуулары сэргэ, быйыл Мииринэйгэ 173 миэстэлээх 1-кы нүөмэрдээх оскуола иккис куорпуһун үлэҕэ киллэриэхтэрэ. Үс мэндиэмэннээх тутуу уопсай иэнэ – 1,6 тыһ. кв.м. тахса, 80 % бэлэм. Дьиэ илин өттүн оҥороллор, вентиляционнай куораптарын таҥаллар, тэриллэрин уонна муостатын уураллар. Улуус баһылыга Александр Басыров Айсен Николаевка, оскуола саҥа куорпуһа быйыл үлэлээн саҕалыа диэн иһитиннэрдэ.

Быйыл балаҕан ыйыгар Мииринэй кырачаан олохтоохторун саҥа Оҕо дыбарыаһа үлэҕэ киирэн үөрдүөҕэ.  Күн бүгүн тутуу бэлэмэ 70 % тэҥнэһэр, уопсай иэнэ 6 тыһ. кв.м. тахса.

Дыбарыаска оҕо сайдарыгар усулуобуйа барыта тэриллиэҕэ – “Кванториум” технопаарка, “IT-куб”, омук тылларын үөрэтэр уонна оҕону эрдэ сайыннарар кииннэр, 300 миэстэлээх саалалаах култуура-үөрэх киинэ. 2 тыһ. кэриҥэ оҕо 40 араас куруһуокка, сиэксийэҕэ сылдьар кыахтаныаҕа диэн Ил Дархаҥҥа эттилэр.

Салгыы Айсен Николаев Мииринэй улуустааҕы киин балыыһатыгар сырытта, мэдиссиинэ тэрилтэтин салааларын үлэтин кытта билистэ, ыарыһахтары кытта кэпсэттэ уонна киин балыыһа өрөмүөнэ хайдах баран иһэрин бэрэбиэркэлээтэ.

Мииринэй улууһугар үөрэх, успуорт, култуура саҥа эбийиэктэрин тутуу Ил Дархан ыйааҕынан, ону тэҥэ, АЛРОСА өйөбүлүнэн тутуллаллар. Санатан эттэххэ, 2022 сыл атырдьах ыйыгар Ил Дархан Айсен Николаев “2030 сылга диэри Мииринэй улууһун сайыннарыы туһунан” ыйаахха илии баттаабыта. Бу туолуутунан, АЛРОСА хампаанньа көмөтүнэн Мииринэй куорат маастар-былаана оҥоһуллубута.

Ил Дархан уонна Бырабыыталыстыба пресс-сулууспата.