Ил Дархан: «Нэһилиэнньэлээх пууннары баһаартан көмүскээһиҥҥэ бэлэмнэрин таһыма намыһах»»

Саха сиригэр быйыл сайын уустук баһаартан сэрэх буолуу сезона күүтэр. Нэһилиэнньэлээх пууннарынан айылҕа баһаарыттан көмүскээһиҥҥэ бэлэмнэрин таһыма намыһах. Ол туһунан Айсен Николаев ЫБМ  хамыыһыйа мунньаҕар иһитиннэрдэ.

«Ойуур баһаарыттан сэрэхтээх буолуу үгэннээн турар кэмэ. Кэнники күннэргэ балаһыанньа бигэтийдэ, ол эрээри 2021 сыллааҕы чахчынан ойуур баһаарын ахсаана ордук элбэх. Онон инникитин уустук буолара күүтүллэр уонна муҥутуур мобилизацияланарбытын ирдиир. Нэһилиэнньэлээх пууннары айылҕа баһаарыттан көмүскээһиҥҥэ бэлэмнээһин таһыма намыһаҕа дьиксиннэрэр. Баһаартан сэрэхтээх буолуу уонна сэрэтэр үлэлэр олох толоруллубатахтар, ардыгар сорох көрдөрүүлэр 15%-тан намыһах. Муниципалитеттар баһылыктара үлэ тэтимин суһаллык улаатыннарыахтарын наада»,-диэн ТГ-ханаалга Айсен Николаев суруйда.

СӨ Бырабыыталыстыбатын бэрссэдээтэлин бастакы солбуйааччы Дмитрий Садовниковка баар балаһыанньаны кытаанах хонтуруолга ылан, бары тэрээһиннэри толорууну тус бэйэтэ кэтээн көрөрүгэр сорудахтаата. Итиэннэ сүбэ мунньахха халаан уутун куттала ааспыта бэлиэтэннэ. Өлүөнэ, Дьааҥы, Индигиир уонна Халыма өрүстэригэр муус уһугар таҕыста.

«Ордук Орто Халыма үлэтин бэлиэтиэхпин баҕарабын. Муус харыытын туоратыыга кинилэр дьайыылара чуолкайдар этилэр. Бу дьаһаллар көмөлөрүнэн, халаан уутуттан Орто Халыманы харыстыыр кыахтанныбыт», — Айсен Николаев иһитиннэрэр.