Ил Дархан Нерюнгри ыччатын кытта саҥа успуорт былаһааккаҕа көрүстэ

Нерюнгрига Айсен Николаев элбэх функциялаах успуорт былаһааккаҕa сылдьан, куорат эдэр олохтоохторун кытта көрүстэ уонна кэпсэттэ.

Оҕолор Оҕо көмүскэлин күнүгэр – бэс ыйын 1 күнүгэр аһыллыбыт саҥа былаһааккаҕа үөрэ-көтө успуордунан дьарыктаналларын, манна үчүгэй усулуобуйа тэриллибититтэн үөрэллэрин туһунан кэпсээтилэр.

«Элбэх функциялаах успуорт былаһааккаҕа оҕолор да, улахан дьон да табыгастаах уонна куттала суох усулуобуйаҕа успуордунан дьарыктаналларыгар барыта оҥоһуллубута көстөр. Саҥа эбийиэк улуус көҕүлээһининэн “Колмар” хампаанньа өйөбүлүнэн тутуллубута бэлиэ. Нерюнгри мастер-былаанын чэрчитинэн социальнай эбийиэктэр эрэ буолбакка, саҥа уопсастыбаннай миэстэлэр, успуорт былаһааккалар тэриллиэхтэрэ, тиэргэннэр уонна уулуссалар тупсарыллыахтара. Бу барыта куорат олохтоохторун олоҕун хаачыстыбатын тупсарыыга туһуланар», – диэн Айсен Николаев бэлиэтээтэ.

Эбийиэк улуус дьаһалтатын көҕүлээһининэн муниципальнай оройуон бүддьүөтүн үбүн-харчытын суотугар тутулунна, ону таһынан “Колмар УК” ХЭУо спонсорскай көмөнү оҥордо. Былаһаакка сүүрүүгэ, тренажерга дьарыктаныыга, футболга, волейболга, баскетболга оонньуурга аналлаах. Манна бары баҕалаахтар сарсыарда 8:00 чаастан киэһэ 22:00 чааска диэри дьарыктаныахтарын сөп.

Санатар буоллахха, дойду Бэрэсидьиэнэ Владимир Путин сорудаҕынан Уһук Илин куораттарын, ол иһигэр Дьокуускай уонна Нерюнгри, мастер-былааннара оҥоһуллан олоххо киллэриллэллэр. Бу туһунан СӨ Ил Дарханын уонна Бырабыыталыстыбатын пресс-сулууспата иһитиннэрэр.