Ил Дархан Оҕо хамсааһынын күнүнэн эҕэрдэлиир

Саха Өрөспүүбүлүкэтин Ил Дархана Айсен Николаев өрөспүүбүлүкэ олохтоохторун Оҕо хамсааһынын күнүнэн эҕэрдэлээтэ.

Ытыктабыллаах оҕо уопсастыбаннай түмсүүлэрин бэрэстэбиитэллэрэ, күндү доҕоттор!

Эһигини Саха Өрөспүүбүлүкэтигэр Оҕо хамсааһынын күнүнэн — бэйэлэрин дойдуларыгар, күүстэригэр-уохтарыгар уонна үтүө дьыала аан дойдуну уларытар кыахтааҕар итэҕэйэр дьон бырааһынньыгынан ис сүрэхпиттэн эҕэрдэлиибин! Бүгүн биһиги сайдар, айар-тутар уонна доҕордоһор эйгэни күннэтэ айан-тутан таһаарар хас биирдии оҕо, уһуйааччы уонна педагог үлэтин, эрчимин уонна көҕүлээһинин бэлиэтиибит. Бүгүн өрөспүүбүлүкэҕэ 100 тыһыынчаттан тахса көхтөөх оҕону түмэр

«Дьулуур» оҕо биир кэлим хамсааһына ситиһиилээхтик үлэлиир. Иитэр үлэҕэ дойдуга саамай бөдөҥ «Бастакылар хамсааһыннара» Бүтүн Арассыыйатааҕы уопсастыбаннай-судаарыстыбаннай хамсааһын баһылыыр-көһүлүүр оруоллаах. Хамсааһын салаалара өрөспүүбүлүкэ бары 36 улууһугар тэрилиннилэр, 800-тэн тахса бастакы сүһүөх тэрилтэтэ аһылынна. Манна 87 штаттаах үлэһит — дьулуурдаах уонна бэйэлэрин идэлэригэр бэриниилээх исписэлиистэр үлэлииллэр. 2025 сыл Саха сиригэр дьиҥ чахчы киэҥ далааһыннаах уонна түмүктээх буолла.

«Бастакылар хамсааһыннарын» эрэгийиэннээҕи салаата 57 бырайыагы олоххо киллэрдэ, онно 43 тыһыынчаттан тахса оҕо кытынна. Биһиги эдэр биир дойдулаахтарбыт билим уонна айар үлэттэн саҕалаан, успуорка, амарах санааҕа уонна патриотическай көҕүлээһиннэргэ тиийэ араас хайысхаларга бэйэлэрин бэркэ көрдөрдүлэр. «Зарница 2.0» оонньууга ситиһиилэр туспа болҕомтону эрэйэллэр. Онно 27 тыһыынчаттан тахса үөрэнээччи кыттыбытыттан Горнай улууһун «Мохсоҕол» хамаандата уокуруктааҕы түһүмэххэ кыайыыны ситистэ, оттон Үөһээ Бүлүү улууһун «Сайдам» этэрээтэ федеральнай мунньахтарга чиэстээхтик кыттан, сүрүн түһүмэхтэргэ бастакы уонна иккис миэстэлэри ылла. «Бастакылар ыҥырыылара» успуорт бырайыагар оҕолор эмиэ үрдүк бэлэмнээхтэрин көрдөрдүлэр: 9056 кыттааччы, федеральнай түһүмэххэ алта мэтээл. Өрөспүүбүлүкэ айар кэлэктииптэрэ эмиэ үрдүк таһымнарын бигэргэттилэр: «Арассыыйа оскуолатааҕы сааһа» Бүтүн Арассыыйатааҕы бэстибээлгэ «Кэскил» ансаамбыл II истиэпэннээх лауреат буолла, оттон «Долун» ансаамбыл Арассыыйа норуоттарын үгэстэрин харыстааһын иһин анал бирииһинэн наҕараадаланна.

Өрөспүүбүлүкэҕэ өйөбүлгэ наадыйар оҕолорго ураты болҕомто ууруллар. 10 тыһыынчаҕа чугаһыыр оҕо, ол иһигэр доруобуйаларынан хааччахтаах, кыаммат-түгэммэт ыаллартан уонна анал байыаннай дьайыы кыттыылаахтарын дьиэ кэргэттэриттэн төрүттээх оҕолор, тематическай симиэнэлэргэ уонна чэбдигирдэр бырагыраамаларга кытыннылар. Сүрүн хайысха — сэрэтэр учуокка турар уолаттары-кыргыттары бырайыактарга угуйуу: кинилэр кыттыыларын таһыма бүгүн 61%-тан таҕыста, бу үгүс оҕо дьылҕатын уларытарга көмөлөһөр. Оҕо хамсааһынын бары кыттыылаахтарыгар ис сүрэхпиттэн махталым тылларын тиэрдэбин: оҕолорго — билиигэ-көрүүгэ тардыһыыларын уонна туһаны аҕалар баҕаларын иһин; педагогтарга уонна уһуйааччыларга — сыралаах үлэлэрин уонна киэҥ көҕүстэрин иһин; төрөппүттэргэ — өйөбүллэрин иһин; эрэгийиэннээҕи уонна олохтоох салаалар хамаандаларыгар — хас биирдии оҕо дьоҕурун арыйарыгар усулуобуйаны тэрийэллэрин иһин. Күндү доҕоттор! Бу бырааһынньык сомоҕолоһуу, үтүө санаа уонна инникигэ дьулуур бэлиэтэ буоллун. Саха сирин хас биирдии эдэр олохтооҕо хорсуннук ыраланнын, улахан ситиһиилэннин уонна бэйэтин күүһүгэр эрэннин. Оттон улахан дьоҥҥо кэлэр көлүөнэни иитии курдук ытык иэскэ муудараһы, тулууру уонна айар кынаттаах буоларгытыгар баҕарабын. Бырааһынньыгынан! Оҕо хамсааһынын күнүнэн! Оҕолорбут дьоллоох, бэйэлэригэр эрэллээх, өрөспүүбүлүкэлэринэн уонна дойдуларынан киэн туттар дьон буола улааттыннар!

Саха Өрөспүүбүлүкэтин Ил Дархана Айсен Николаев