Ил Дархан олохтоох салайыныы Сэбиэтин кэҥэтиллибит мунньаҕын ыытта

Ахсынньы 11 күнүгэр Дьокуускайга Саха Өрөспүүбүлүкэтин Ил Дарханын иһинэн үлэлиир Олохтоох салайыныы сэбиэтин кэҥэтиллибит мунньаҕа буолла. Тэрээһин «Малая родина – сила России» III Бүтүн Арассыыйатааҕы муниципальнай пуорум чэрчитинэн ыытылынна.

Сэбиэт үлэтигэр РФ Бэрэсидьиэнин ис бэлиитикэҕэ управлениетын начаалынньыгын солбуйааччыт Евгений Грачев, ВАРМС хос бэрэссэдээтэлэ, РФ Бэрэсидьиэнин иһинэн үлэлиир Олохтоох салайыныыны сайыннарыыга сэбиэт президиумун чилиэнэ Ирина Гусева, өрөспүүбүлүкэ бырабыыталыстыбатын чилиэттэрэ, муниципальнай оройуоннар уонна куораттааҕы уокуруктар баһылыктара кытыннылар.

Мунньах кэмигэр тирэх нэһилиэнньэлээх пууннары сайыннарыы бырайыактарын олоххо киллэрии түмүктэрэ билиһиннэрилиннилэр. 2020–2024 сылларга Саха сирин 43 маннык сиригэр-уотугар 23,8 тыһыынчаттан тахса киһи саахалланар туруктаах дьиэттэн көһөрүлүннэ, 200 км кэриҥэ массыына суола саҥардылынна, 153 оптуобус атыыланан бэрилиннэ, социальнай эйгэ эбийиэктэрэ саҥардылыннылар, гаастааһын уонна инженернэй ситимнэри сайыннарыы бырайыактара олоххо киирдилэр. Үбүлээһин уопсай кээмэйэ 129 млрд солкуобайга тэҥнэстэ, ол иһигэр федеральнай, эрэгийиэннээҕи, муниципальнай уонна бүддьүөттэн тас үп-харчы киирэр.

Түмүккэ Сэбиэт муниципальнай тэриллиилэргэ сири-уоту былааннааһын докумуоннарын саҥардыыны түмүктүүргэ, бырайыак-симиэтэ  докумуоннарын кэмигэр бэлэмнииргэ уонна федеральнай бырагыраамалар куонкурустарыгар көхтөөхтүк кыттарга сүбэлээтэ.

«Биһиги нэһилиэнньэлээх пууннарбытыгар олох-дьаһах төһө табыгастаах буолара былаас бары таһымнарын дьүөрэлээн үлэлээһиниттэн тутулуктаах. Бииргэ сүбэлэһэн, инники диэки барыахтаахпыт», — диэн Айсен Николаев түмүктээн эттэ.