Хаартыска: А.Сорокин (СИА)
Кулун тутар 23 күнүгэр Ил Дархан Айсен Николаев килиимэт уларыйыытын боппуруостарыгар аан дойдутааҕы кэмпириэнсийэ чэрчитинэн Арассыыйа тас дьыалаларыгар министиэристибэтин омук суруналыыстарын кытары көрүстэ.
«Килиимэт уларыйыыта киһи аймаҕы барытын долгутар. Маннык кэмпириэнсийэни тэрийии учуонайдар икки ардыларыгар наукаҕа билиини атастаһарга көмөлөһөрүгэр эрэллээхпин уонна килиимэт уларыйыыта туруорар чахчыларыгар киһи аймах көдьүүстээхтик хардарарыгар көмөлөһүөҕэ. Арассыыйа сүрүн өттө ирбэт тоҥ сиригэр сытар, ол иһигэр Саха сирин барыта кэриэтэ. Ол иһин, дойдуга ирбэт тоҥу үөрэтии дьоһуннаахтык ыытыллар”, — диэтэ Айсен Николаев.
Көрсүһүүгэ Греция, Монголия, Indian Express, Cumhuriyet (Турция), India Today хаһыаттар, МТИ агентство (Венгрия), Nhan Dan хаһыат (Вьетнам), «ВИА» иһитиннэрэр агентство (Вьетнам), Пакистан телевидениетын, «Аль-Маядин» телеханаал (Ливан), ATV телеханаал (Турция), «Хабар» телеагентство (Казахстан) суруналыыстара кытыннылар.
Эрэгийиэн баһылыга ирбэт тоҥ сылыйыытыгар, килиимэт уларыйыытыгар, сааҥсыйа усулуобуйатыгар Саха сирин сайдыытын, Арассыыйа доҕордуу дойдуларын кытары бииргэ үлэлээһин кэскилин, табаары тастан аҕалыы уо.д.а. сыһыаннаах ыйытыыларга хоруйдаата.
«Саха сирэ билигин Арассыыйа ордук сайдар эрэгийиэннэриттэн биирдэстэрэ. Арҕаа дойдулар Арассыыйаны утары киллэрэр сааҥсыйалара баарын да иһин, былырыын өрөспүүбүлүкэ бырамыысыланнаска көрдөрүүтэ 10-тан тахса бырыһыан улааппыта. Биһиги 2022 сыл түмүгүнэн бу көрдөрүүнэн дойдуга — 8-с миэстэҕэ, эрэгийиэннээҕи валовай бородууктаҕа Уһук Илиҥҥэ — бастакы, хостонор баайы таһаарарга Арассыыйа биэс бастакы эрэгийиэнин иһигэр киирэбит. Саха сирэ туһалаах баайы – ньиэби, гааһы чоҕу уонна көмүһү хостооһуҥҥа төрдүс сылын инники иһэр”, — диэн Айсен Николаев суруналыыстар ыйытыыларыгар хоруйдаата.
Анаабыр улууһун олохтооҕо, үс кыыс ийэтэ Изабелла Попова сөбүлүүр идэтин өссө үчүгэйдик сайыннаран, эбии дохуот…
Билигин атыыланар бородуукталарга араас элбэх эбиликтээх буолан, кэлин болҕомто да уурбат курдукпут. Оттон тугу сиирбит…
Вирустаах инфекциялары эмтииргэ антибиотиктары туһаныы чаастатык сыыһа-халты быһаарыныы буолар. Санатар буоллахха, Саха сиригэр микробу утары…
Киһи анаалыс туттаран ханнык битэмиин тиийбэтин бэрэбиэркэлэппэтэх буоллаҕына, анемиялааҕын билимиэн сөп. Ол эрээри миэдиктэр этэллэринэн,…
Мэҥэ Хаҥалас Хаптаҕайыгар өссө биир кэрэ бэлиэ тэрээһин ааста. Саас-сааһынан кэпсээтэххэ, тумус туттар ытык киһибит,…
Саха Өрөспүүбүлүкэтин норуодунай артыыһа Алексей Павлов салайар Үүнэр Көлүөнэ тыйаатыра Михаил Шолохов "Киһи дьылҕата" диэн…