Ил Дархан отчуотун байыаннай дьайыыга көмөттөн саҕалаата

Ил Түмэн 13-с уочараттаах пленарнай мунньаҕар Ил Дархан Айсен Николаев СӨ Бырабыыталыстыбатын 2024 сыллааҕы  үлэтин-хамнаһын түмүктэринэн, Ил Түмэн туруорбут боппуруостарынан сыллааҕы отчуотун оҥордо.

Ил Дархан отчуотун байыаннай дьайыыга көмөттөн саҕалаата. Уопсайа байыаннай дьайыы буола турар сиригэр 4000 араас тиэхиньикэ ыытыллыбыт, ол иһигэр квадрокоптер, тепловизордар, генератордар, о.д.а.. 1100 баһыылка, 80 т гуманитарнай таһаҕас, 26 тыһ. бырааһынньыктааҕы ас-үөл набора тиэрдиллибит.

Өрөспүүбүлүкэ иһигэр байыаннай дьайыы кыттыылаахтарын, дьиэ кэргэттэрин өйүүр 45 миэрэ үлэлиир, олохтоох медиктэр байыаннай госпиталларга, психологтар баран үлэлээбиттэр. 629 байыаннай дьайыы кыттыылааҕа, кини дьиэ кэргэттэрэ үлэнэн хааччыллыбыттар. Байыастары эйэлээх олоххо төнүннэрии, араас таһымнаах үөрэхтэргэ киллэрэн идэни биэрии, судаарыстыбаннай управлениеларга үлэҕэ ылыы ситимнээхтик бара турар.