Ил Дархан «Помоги выжить» пууҥҥа сырытта

Бэҕэһээ, олунньу 5 күнүгэр, Ил Дархан Айсен Николаев Дьокуускай куорат Очиченко уулуссатын 57 нүөмэригэр баар «Помоги выжить» диэн бэйдиэ сылдьар ыттары быстах кэмҥэ тутар пууҥҥа сырытта.

Кини пууҥҥа сылдьан ыттар турар усулуобуйаларын көрдө. Бэлиэтээн суруйдахха, былырыыҥҥыттан бүрүсүлүөскэ уорбаланар куһаҕан анаалыстаах ыттар туспа харантыын зонатыгар туралларын, ыттары күҥҥэ иккитэ аһаталларын уонна волонтердар баҕа өттүлэринэн илии-атах буолан пууҥҥа көмөлөһөллөрүн көрбүт-истибит.  Билиҥҥи туругунан бүрүсүлүөскэ уорбаланар ыттар анаалыстара Санкт-Петербург, Ставрополь куораттар лабораторияларыгар ыытыллыбыт. Анаалыстар түмүктэрэ муус устар ыйга кэлиэхтээхтэр. Онуоха диэри уорбаланар ыттар туспа тутуллан тураллар.

“Помоги выжить” пуун салайааччыта Екатерина Безрученко:

-Мин билигин уоппускаҕа өрөспүүбүлүкэ таһыгар сылдьабын. Онон Ил Дархан пууммутугар кэлбитигэр көрсүбэтим. Миигин солбуйан үлэлиир Розалия Кощеева ыкка ытыртаран дьиэтигэр олорор. Онон бу уоппускаҕа сылдьар кэммэр миигин солбуйар киһи суоҕа. Бу нэдиэлэҕэ үлэбэр тахсабын.