Ил Дархан Приморскай байыаннай чаастарыгар үлэтин салҕыыр

“Бүгүн биир дойдулаахтарбыт бэлэмнэниини ааһар байыаннай чаастарыгар сылдьыыбын салҕыыбын. Саха сириттэн улахан бөлөх баар ВДВ  десантнай-штурмовой туспа биригээдэтигэр сырыттым. Биһиги оҕолорбутун идэлэрин чахчы баһылаабыт, анал байыаннай эпэрээссийэ сиригэр байыаннай дьайыыга сылдьыбыт дьон бэлэмнииллэр. Сэптэрэ-сэбиргэллэрэ уонна таҥастара-саптара үчүгэй.

Саха сирэ бэргэн ытааччыларынан, снайпердарынан биллэрэ. Бүгүн хамандыыртан биһиги уолаттарбыт чаҕылхай түмүгү көрдөрөллөрүн, сыалга чопчу ыталларын истэн киэн тутта санаатым. Биһиги байыастарбыт хааччыллыбыт АК-12 саҥа аптамаатынан ытан көрдүм.Үчүгэй эрэ өйдөбүл хаалла!”, — диэн Ил Дархан бэйэтин телеграмҥа ханаалыгар санаатын үллэстэр.