Ил Дархан пуорум кыттааччыларын кытта көрүстэ

«Малая Родина — сила России» «Опорные точки роста: пространственное развитие территории» Бүтүн Арассыыйатааҕы III муниципальнай пуорумун кыттааччылара СӨ Ил Дарханынан Айсен Николаевы кытта көрүстүлэр.

Кэпсэтиини Олохтоох салайыныыны сайыннарыы Бүтүн Арассыыйатааҕы ассоциациятын (ВАРМСУ) хос бэрэссэдээтэлэ, РФ Бэрэсидьиэнин иһинэн олохтоох салайыныыны сайыннарар Сэбиэт президиумун чилиэнэ Ирина Гусева ыытта.

Аһаҕас кэпсэтии кэмигэр эрэгийиэннэргэ көдьүүстээх салайыы сүрүн тосхоллорун дьүүллэстилэр. СӨ Ил Дархана муниципалитеттар баһылыктарын ураты суолталарын бэлиэтээтэ, кинилэри дьоҥҥо саамай чугас, гражданнар төрүөҕүттэн кырдьыар диэри олохторун хаачыстыбатын иһин толору эппиэтинэһи сүгэр салайааччыларынан ааттаата.

Айсен Николаев олохтоохтору кытта сирэй көрсөн кэпсэтии суолтатыгар ураты болҕомтотун уурда.

«Норуоту кытта сибээс сүттэҕинэ, кыһалҕалар саҕаланаллар. Дьиэ кэргэттэргэ булгуччу сылдьан, сорудахтар хайдах толоруллалларын бэрэбиэркэлиэххэ наада. Бу — саамай сүрүнэ», — диэн Ил Дархан  бэлиэтээтэ. Айар индустриялары уонна урбаанньыты өйөөһүн туспа тиэмэнэн көтөҕүлүннэ. Айсен Николаев дьоҕурдаах ыччакка уонна биисинэскэ анаан эйгэни тэрийиигэ сыаллаах-соруктаах үлэ ыытылларын туһунан кэпсээтэ. Кини бу хайысха сайдыытын бэйэтэ тус хонтуруолугар тутарын эттэ.