Ил Дархан РФ Генеральнай борокуруорун солбуйааччытын уонна өрөспүүбүлүкэ саҥа борокуруорун кытта көрүстэ

СӨ Ил Дархана Айсен Николаев  РФ Генеральнай борокуруорун солбуйааччыта Сергей Зайцевы кытта оробуочай мунньаҕы ыытта. Мунньахха өрөспүүбүлүкэ саҥа борокуруора Сергей Дябкины билиһиннэрдилэр.

Көрсүһүү кэмигэр өрүттэр эрэгийиэҥҥэ борокуратуура уорганнарын үлэтин тэрийэр боппуруостары, ону тэҥэ судаарыстыбаннай былаас уорганнарын кытта бииргэ үлэлиир сүрүн хайысхаларын ырыттылар.

Сергей Зайцев өрөспүүбүлүкэ саҥа борокуруорун Сергей Дябкины идэтинэн үрдүк таһымнааҕын бэлиэтээтэ,  үлэтин эйгэтигэр дириҥ билиилээҕин уонна чопчу түмүктэри ситиһэргэ дьулуһарын эттэ. Кини өрөспүүбүлүкэ саҥа борокуруорун уопута уонна сатабыла Саха сиригэр сокуоннаһы бөҕөргөтөргө уонна кэтээн көрөр тиһиги салгыы сайыннарарга туһалыа диэн эрэлин биллэрдэ.

Санатан эттэххэ,  РФ Бэрэсидьиэнэ Владимир Путин Сергей Дябкины Саха Өрөспүүбүлүкэтин борокуруорун дуоһунаһыгар аныыр туһунан ыйаахха илии баттаабыта. Бу иннинэ Сергей Дябкин Тыва Өрөспүүбүлүкэтин борокуруорунан үлэлээбитэ.