Ил Дархан РФ үпкэ миниистирэ Антон Силуановтыын көрүстэ

СӨ Ил Дархана Айсен Николаев  РФ үпкэ миниистирэ Антон Силуановы кытары оробуочай көрсүһүүтэ буолла.

Ил Дархан 2026 сылга федеральнай бүддьүөтү оҥорууга Саха Өрөспүүбүлүкэтигэр өйөбүлүн иһин Антон Германовичка махтанна.

-Бу биһиги бүддьүөппүтүгэр уонна эрэгийиэн сайдыытын дьоһун суолталаах бырайыактарын олоххо киллэрэргэ  дьоһуннаах көмө.  Өлүөнэ  муостатын уонна Дьокуускай куоракка саҥа кыбартааллары тутуулары кытары сибээстээх Саха сирин  дьоһун бырайыактарын олоххо киллэрэргэ  казначейскай инфраструктурнай кирэдьиити биэрэргэ көмөтүн  иһин Үп министиэристибэтигэр туспа махталбын  тириэртим. Ону сэргэ дойду бэрэсидьиэнин сорудахтарын толорууга,  хотугу сиргэ таһаҕаһы тириэрдии ороскуотун үбүлээһин источниктарын буларга  холбоһуктаах үлэни салгыырга сүбэлэстибит.

Арассыыйа Үбүн министиэристибэтин кытары хардарыта бииргэ үлэлээһин Саха сирэ туруктаахтык сайдарыгар көмөлөһөрүгэр эрэллээхпин, — диэн Ил Дархан МАХ ханаалыгар иһитиннэрдэ.