Ил Дархан Саас уонна Үлэ бырааһынньыгынан эҕэрдэтэ

Ытыктабыллаах Саха сирин олохтоохторо!

Саха Өрөспүүбүлүкэтин салалтатын уонна тус бэйэм ааппыттан эһигини Ыам ыйын 1 күнүнэн – Саас уонна Үлэ бырааһынньыгынан ис сүрэхпиттэн эҕэрдэлиибин!
Айылҕабыт уһуктан, уһун кыһыммыт бүтэн, сааһы көрсөр үөрүүлээх бырааһынньыкпыт тиийэн кэллэ. Бу – элбэх омуктаах Сахабыт сирин норуотун сомоҕолуур, сырдык, ыраас ыра санаабытын, эрэлбитин, былааммытын олоххо киллэрэр, биһиги бүттүүн тутаах сорукпутун – хас биирдии киһи үлэтинэн-хамнаһынан уйгулаах олоҕу оҥосторун көрдөрөр кэрэ бэлиэ күммүт.
Быйылгы ыам ыйын 1 күнэ Саха Өрөспүүбүлүкэтигэр Үлэ сыла биллэриллибитинэн уратылаах. Биһиги Үлэ киһитин сүҥкэн суолтатын уопсастыбабыт сөптөөхтүк сыаналыырыгар баҕарабыт. Өрөспүүбүлүкэбит үгүс көрдөрүүлэринэн бастыҥнар ахсааннарыгар киирэрин туһугар биһиги хотугу тыйыс уонна кэрэ кыраайбытыгар үгүс көлүөнэ дьон үлэлээбитэ.
2019 сылтан эрэгийиэннээҕи баалабай бородуукта кээмэйинэн уонна бырамыысыланнай үүнүү тэтиминэн Саха сирэ Россия Федерациятыгар бастыҥнар кэккэлэригэр сылдьар, Уһук Илиҥҥи Федеральнай уокурукка бастаан иһэр. Биһиэхэ үлэ киһитэ кыаҕын, эрчимин арыйарыгар усулуобуйа барыта баар. Кэнники сылларга Саха сиригэр экэниэмикэ бары эйгэтигэр үлэ саҥа миэстэтин таһаарарга, үлэһиттэр хамнастарын үрдэтэргэ үгүһү оҥордубут. Бүгүн өрөспүүбүлүкэҕэ үлэтэ суох буолуу 5,8% диэри кыччаата, бу 2000 сылтан муҥутуур намыһах көрдөрүү.
Үлэ киһитин өрө тутуу дьоһун суолталаах. Бу бырааһынньык иннинэ Ил Дархан сыллата ананар “Үлэ киһитэ” бириэмийэтэ 50 бастыҥ үлэһиккэ туттарылынна. Кинилэр сыралаах үлэлэринэн төрөөбүт өрөспүүбүлүкэлэрин сайдыытыгар дьоһун кылааты киллэрдилэр. Үлэ бириэмийэтин лауреаттарын үтүө холобурдара Саха сирин олохтоохторун үлэҕэ-хамнаска кынаттаатын, оҕолорбутун үлэлииргэ үөрэттин!
Биһиги Дьокуускай уонна Алдан – үлэ албан аатын сүгэр икки куораттаахпытынан киэн туттабыт. Саха сирин олохтоохторо, биһиги аҕаларбыт уонна эһэлэрбит Аҕа дойду Улуу сэриитигэр дойдубут Кыайыытыгар сүҥкэн кылааты киллэрбиттэрэ, оччотооҕу хас биирдии киһи, бүтүн кэлэктииптэр бэйэни харыстаммат күүрээннээх үлэлэрэ үрдүктүк сыаналаммыта.
Саха киһитэ үлэни кыайарынан биллэр. Биһиги үлэбит түмүгэ бүгүн даҕаны дойдубутугар, Сэбилэниилээх Күүспүтүгэр, анал байыаннай дьайыыга нацизмы утары охсуһар дьоммутугар ураты суолталаах. Дойдубутугар утары барар дойдулар туохха да тэҥнэммэт санкцияларыгар баттаппакка, Саха сирин олохтоохторо үлэлэринэн судаарыстыба эрэллээх тыылын оҥороллор, Ийэ дойдубут экэнэмиэкэтин уонна оборуонатын күүһүн бөҕөргөтөллөр. Бүгүн иннибитигэр баар бары харгыстары кыайыахпыт уонна эйэлээх үлэбит көмүскэллээх буолуоҕа диэн эрэнэбин.
Быйылгы бырааһынньыкка үлэ кэлэктииптэрин көрсүһүүлэрэ, куонкурустар, култуура тэрээһиннэрэ уонна анал байыаннай дьайыы кыттыылаахтарыгар гуманитарнай акциялар ыытыллыахтара. Дойдубут кэскилин көмүскүүр уустук кэммитигэр биһигиттэн сомоҕолоһуу, тулуур уонна күүрээннээх үлэ ирдэнэр.
Күндү доҕоттор! Барыгытыгар чэгиэн доруобуйаны, этэҥҥэ буолууну баҕарабын! Сааскы чаҕыл күн сүргэҕитин көтөхтүн!

Саха Өрөспүүбүлүкэтин Ил Дархана                                 А.С. Николаев