Ил Дархан эҕэрдэтэ

Саха Өрөспүүбүлүкэтигэр Гражданскай актыбыыс күнүнэн Ил Дархан эҕэрдэтэ.

Ытыктабыллаах уопсастыбанньыктар, волонтердар хамсааһыннарын бэрэстэбиитэллэрэ!

Саха Өрөспүүбүлүкэтин салалтатын уонна тус бэйэм ааппыттан Саха Өрөспүүбүлүкэтигэр Гражданскай актыбыыстар күннэринэн эҕэрдэлиибин!

Биһиги өрөспүүбүлүкэбитигэр көмөҕө, өйөбүлгэ наадыйааччыларга үтүө санааларынан ис сүрэхтэриттэн көмөлөһөөччүлэр сыл ахсын элбээн иһэллэр. Саха сиригэр бүгүҥҥү күҥҥэ 2 377 кэммиэрчэскэйэ суох тэрилтэ регистрациялаах, үксэ — 2 289 — социальнай хайысхалаах, ол эбэтэр, дьон дьоллоох олоҕун, этэҥҥэ буолуутун туһугар тэриллибиттэр.

Тулабытыгар барыта тупсарын, кэрэ, үчүгэй буоларын туһугар, үтүөнү-кэрэни бэлэхтииргэ волонтердар хамсааһыннарынан дьарыктанар Саха сирин олохтоохторо элбииллэр. Кинилэр бэтэрээннэргэ, доруобуйаларынан хааччахтаах дьоҥҥо кыһамньыларын ууран көмөлөһөллөр, ыччакка бэйэлэринэн холобур буолаллар, уһуйаллар, төрөппүт көрүүтэ суох хаалбыт тулаайахтары, оҕолору кытары үлэлэһэллэр, социальнай бырайыактары толкуйдууллар, киэҥ эйгэҕэ таһаараллар, инники олоххо эрэли саҕаллар, олорорго табыгастаах усулуобуйа баар буоларыгар бырайыактары оҥороллор, тиэргэн уонна уулусса тупсаҕай буоларыгар ылсаллар, нэһилиэнньэ сынньалаҥын тэрийэллэр, үтүө дьыаланы оҥоро олороллор.

Коронавируһу, ойуур баһаардарын утары охсуһууга, байыаннай дьайыы кыттыылаахтарын дьиэ кэргэттэригэр көмөлөһүүгэ барытыгар көхтөөхтүк кыттааччылар инники кэккэҕэ сылдьаллар. Байыаннай эпэрээссийэ кэмигэр Саха сирин дьоно сомоҕолоохторун, хардарыта көмөлөсүһэллэрин көрдөрдүлэр. Киэҥ далааһыннаах Бүтүн Арассыыйатааҕы #МЫВМЕСТЕ аахсыйаҕа биһиги өрөспүүбүлүкэбит олохтоохторо көхтөөх кыттыыны ылаллар. Байыаннай дьайыы кыттыылаахтарын дьиэ кэргэттэригэр тиһиктээх көмөнү оҥороллор.

Бары улуустарга волонтердар ыстааптара тэриллэннэр, байыаннай дьайыы кыттыылаахтарыгар гуманитарнай көмөнү оҥорорго көхтөөхтүк кытталлар. Пууннарга тыһыынчанан киһи таҥас-сап, эмп-томп, ас-үөл илдьэн биэрэр, дьахталлар байыастарга эбии таҥас-сап тигэллэр. Өрөспүүбүлүкэттэн байыаннай эпэрээссийэ кыттыылаахтарыгар 27 туонна таһаҕас ыытыллыбыта. Биһиги байыастарбыт дойдулаахтарын өйөбүллэрин, дойдуларыгар дьонноро-сэргэлэрэ күүтэллэрин билэллэр.

Ытыктабыллаах доҕоттор! Бэйэҕит дьыалаҕытынан ким баҕарар дьоҥҥо көмөлөһүөн сөптөөҕүн көрдөрөҕүт. Хоту сир дьоно көмөлөһөргө дьулуһуулара үйэлэри уҥуордаан кэлбит үгэс буолар. Бу үтүө үгэс биһиги өбүгэлэрбит кытаанах, тымныы усулуобуйаҕа тыыннаах хаалалларыгар көмөлөспүт. Бүгүн барыга көхтөөх дьоммут үтүө дьыалаларынан уонна сырдык санааларынан салайтаран өйөбүлү оҥороллоро, көмөлөһөллөрө төрөөбүт өрөспүүбүлүкэлэрин, дойдуларын дуорааннаахтык ааттатар.

Сахабыт сирэ уонна Арассыыйа туһугар бары саҕалааһыннаргыт уонна үтүө дьыалаларгыт ситиһиилээх буолалларыгар баҕарыбын. Эйэлээх халлааны,  доруобуйаны уонна дьолу!

Саха Өрөспүүбүлүкэтин Ил Дархана А.С. Николаев