Ил Дархан Саха Өрөспүүбүлүкэтин норуоттарын национальнай култууратын күнүнэн эҕэрдэлиир

Күндү Сахабыт сирин олохтоохторо!

Саха сирин салалтатын  уонна тус бэйэм ааппыттан Саха Өрөспүүбүлүкэтин норуоттарын национальнай култууратын күнүнэн эҕэрдэлиибин!

Биһиги ураты кыраайбытыгар эйэлээхтик-иллээхтик 135 араас омук бэрэстэбиитэллэрэ олороллор. Бу бэлиэ күн, бырааһынньык  үйэлэр тухары салҕанан, көлүөнэттэн көлүөнэҕэ харыстабыллаахтык бэриллэн кэлбит уратылаах баай үгэстэри, култуураны көрдөрөр. Култуура элбэх өрүттээх көстүүлэригэр норуоттар муударай өйдөрө-санаалара, төрөөбүт сирдэригэр тапталлара уонна үтүөҕэ-кэрэҕэ тардыһыылара түмүллэр.

Биһиги өрөспүүбүлүкэбитигэр А.Е.Кулаковскай-Өксөкүлээх Өлөксөй аатынан норуоттар доҕордоһууларын дьиэтэ, «Арассыыйа норуоттарын ассамблеята» Бүтүн Арассыыйатааҕы уопсастыбаннай-судаарыстыбаннай түмсүү эрэгийиэннээҕи салаата, ыччат ассамблеята норуоттар икки ардыларынааҕы сыһыаны бөҕөргөтөргө уонна ыччаты патриотическай иитиигэ сирдиир үлэҕэ көхтөөхтүк кытталлар.

65 национальнай-култуурунай түмсүү, 330 община уонна 20 Хотугу аҕыйах ахсааннаах төрүт олохтоох норуоттар уопсастыбаннай түмсүүлэрэ, «Якутский казачий полк» уопсастыба, казактар икки уопсастыбаннай түмсүүлэрэ, уо.д.а. үгэс буолбут национальнай култууралары, төрөөбүт тыллары билиигэ-көрүүгэ сирдииргэ, киэҥник тарҕатыыга бырайыактары олоххо киллэрэллэр. Кинилэр байыаннай дьайыы кыттыылаахтарыгар уонна байыастар дьиэ кэргэттэригэр көмөлөһүү уопсай дьыалатыгар кылааттарын киллэрсэллэр.

Бу күннэргэ куораттарга уонна улуустарга бу бырааһынньыкка анаммыт кэнсиэр арааһа, куонкурустар, күрэхтэһиилэр, төгүрүк остуоллар уонна да атын тэрээһиннэр тиһиктээхтик ыытыллаллар. Саха сирин кэнчээри ыччата,  оҕолор өрөспүүбүлүкэ араас муннугуттан фольклор бэстибээлигэр кытыннылар, талааннарын, дьоҕурдарын көрдөрдүлэр. Норуоттар доҕордоһууларын дьиэтигэр бүгүн «Культурное многообразие Якутии» былаһааккаҕа түмсүөхтэрэ, бырааһынньыктааҕы эҕэрдэ кэнсиэр дьону-сэргэни түмэ тардыа.

Бу бырааһынньык бар дьоммутун саҥа айар-тутар ситиһиилэргэ көҕүлүүрүгэр, сомоҕолоһууну бөҕөргөтөрүгэр эрэнэбин.

Күндү доҕоттор!  Бука барыгытыгар дьолу, эйэни, этэҥҥэ буолууну, айар үлэҕэ, үтүөнү саҕалааһыҥҥа ситиһиилэри баҕарабын.

Саха Өрөспүүбүлүкэтин Ил Дархана Айсен Николаев