Ил Дархан Айсен Николаев Сайылык күнүнэн эҕэрдэлиир

Ытыктабыллаах Саха сирин олохтоохторо, күндү тыа сирин туруу үлэһиттэрэ!

Саха Өрөспүүбүлүкэтин салалтатын уонна тус бэйэм ааппыттан үлэҕэ ытыктабылы, өбүгэ үгэһэ сөҕүмэр күүһүн уонна төрөөбүт сиргэ тапталы кэрэһилиир Сайылык күнүнэн ис сүрэхпиттэн эҕэрдэлиибин!

Сайылык күнүн Саха сиригэр баара-суоҕа сэттэ сыллааҕыта олохтообуппут, ити эрээри бу үтүө үгэспит ааспыт үйэлэртэн силис тардар. Ынах сүөһү сайыҥҥы мэччирэҥҥэ тахсыыта – саха норуотугар дьоһун суолталаах, элбэҕи эрэннэрэр кэм. Сайылыкка көһүү сайыны саҕалыыр Ньукуолун күнүгэр буолара. Ыаллар сүөһүлэрин ыраах сайылыктарыгар көһөрөн, сиэри-туому толорон, мааны остуолу тардан, иччилэртэн быйаҥнаах сайыны, өҥ дьылы көрдөһөллөрө. Сайылык туругуттан ыал сылы туоруура тутулуктааҕа.

Бүгүн сайылык саха ыалын олоҕор-дьаһаҕар ылар суолтатыгар болҕомто ууруллар, сайдарыгар саҥа тыын угуллар. Саха сиригэр 309 сайылык баар, сүрүннээн үүт-табаарынай пиэрмэлэр уонна субай сүөһүнү уотар хайысхалаахтар. Сайын ахсын өлгөм үүнүүлээх мэччирэҥ сирдэргэ 35 тыһыынча ынах сүөһү, ол иһигэр 17 тыһыынча ыанар ынах таһаарыллар.

Балтараа тыһыынча кэриҥэ биир дойдулаахпыт сайылыкка күн тахсыаҕыттан киириэр диэри үлэлээн, үрүҥ илгэни үрүлэтэр, эт бородууксуйатын дэлэтэр.
Судаарыстыба ыытар аграрнай бэлиитикэтин тумус хайысхатынан сайылыктары салгыы сайыннарыы буолар. Кэнники сылларга сайылыктары тэрийиигэ уонна саҥардан биэриигэ 20 тахса хаһаайыстыба судаарыстыба өйөбүлүн ылбыта. Бүгүн 250 тахса сайылык ынаҕы ыыр аныгы аппараатынан хааччылынна, 270 тахса сайылык уот ситимигэр холбонно, генератордары, күн уотунан үлэлиир панеллары, сыыппара технологияларын, сибээс сириэстибэлэрин көхтөөхтүк туһаналлар. Бу барыта фермердэр үлэлэрин чэпчэтэр, оҥорумтуону уонна бородууксуйа хаачыстыбатын үрдэтэр. Омуна суох, сайылык баар буолан саха этэ, үүтэ баар.

Бүгүн Саха сирэ эти-үүтү оҥорон таһаарыытын стратегическай былааҥҥа сөп түбэһиннэрэн, 2030 сылга өрөспүүбүлүкэ үүт аска наадыйыытын 61 %, эт аска наадыйыытын 30 % толунан улаатыннарар буолуоҕа. Онуоха бу сыалы ситиһэргэ сайылык быһаарар суолталаах.
Сайылык күнэ – бу дьиҥнээх сомоҕолоһуу бырааһынньыга. Бу күн биһиги төрөөбүт сирдэригэр олохторун анаабыт дьоммутугар ытыктабылбытын биллэрэбит. Кинилэр сыралаах үлэлэринэн биһиги тыабыт сирэ сайдар, Саха сирин олохтоохторун маанылаах сандалыларыгар мэлдьи сибиэһэй ас-үөл, саха төрүт аһа-үөлэ дэлэйэр.

Талан ылбыт дьыалаҕытыгар бэриниигит, булгуруйбат буулаҕа санааҕыт, төрүт сиргитигэр-уоккутугар тапталгыт иһин ис сүрэхпиттэн махтанабын. Эһиэхэ чэгиэн доруобуйаны, дьиэ кэргэҥҥэ дьолу-соргуну, үрдүк ыамы, өҥ дьылы, хас биирдии саҕалааһыҥҥытыгар ситиһиилэри баҕарабын. Быйылгы мэччирэҥ кэмэ табылыннын, Саха сирин сомоҕолоһуутун, чэлгийэ сайдыытын уонна утума салҕанарын кэрэһитин быһыытынан сайылык үтүө үгэстэрэ көлүөнэттэн көлүөнэҕэ бэриллэ турдуннар!
Сайылык күнүнэн!