Ил Дархан Сэбиэскэй Сойуус Дьоруойа Федор Попов пааматынньыгар сибэкки дьөрбөтүн уурда

Ил Дархан Айсен Николаев ахсынньы 28 күнүгэр Мэҥэ Хаҥалас оройуонугар оробуочай командировкаҕа сылдьар.
Майа сэлиэнньэтигэр үгэс быһыытынан Ил Дархан Сэбиэскэй Сойуус Дьоруойа Федор Попов пааматынньыгар сибэкки дьөрбөтүн уурда. Бу туһунан СӨ Ил Дарханын уонна Бырабыыталыстыбатын пресс-сулууспата суруйар. Сибэкки дьөрбөтүн ууруу сиэригэр-туомугар Мэҥэ Хаҥалас оройуонун баһылыга Дмитрий Тихонов уонна уопсастыбаннас бэрэстэбиитэллэрэ кытыннылар. «Биһиги Аҕа дойду Улуу сэриитин туһунан кырдьыгы харыстыахтаахпыт уонна төрөөбүт дойдуларын туһугар олохторун олук уурбут дьоммут ааттарын умнуо суохтаахпыт. Дьоруойдарга үйэлэр тухары махтанабыт», — диэн Ил Дархан бэлиэтээтэ.
Санатан эттэххэ, алтынньы ыйга Айсен Николаев Минск куоракка Аҕа дойду Улуу сэриитин устуоруйатын судаарыстыбаннай түмэлигэр сылдьыбыта. Кини ССРС Үрдүкү Сэбиэтин Президиумун Федор Поповка Сэбиэскэй Сойуус Дьоруойун аатын иҥэрии туһунан Ыйааҕын куоппуйатын туттарбыта.
Кыайыы 80 сылыгар Дьокуускайга Федор Попов пааматынньыгын аһары былаанныыллар.
Сообщить об опечатке
Текст, который будет отправлен нашим редакторам: