Ил Дархан спортивнай эбийиэктэр өрөмүөннэрин көрдө-иһиттэ

Ил Дархан Айсен Николаев VIII норуоттар икки ардыларынааҕы «Азия оҕолоро» спортивнай оонньуулар ыытыллыахтаах эбийиэктэрин кэрийэн көрдө-иһиттэ.

Аҕа баһылык Н.Н. Тарскай аатынан «Туймаада» стадиоҥҥа сырытта. Манна суолталаах сайыҥҥы тэрээһин аһыллыытын уонна сабыллыытын сиэрэ-туома ыытыллыаҕа. Маны таһынан, кэккэ успуорт көрүҥнэригэр күрэхтэһиилэр буолуохтара.

«Үлэ кыраапык быһыытынан баран иһэр, хаалыы суох. Бэс ыйын 1 күнүгэр үлэ барыта түмүктэниэҕэ. Саҥардыллыбыт эбийиэктэр күрэхтэһиилэр таһымнарын үрдэтиэхтэрэ«, — диэн бэлиэтээтэ  Айсен Николаев.

Стадиоҥҥа саҥа олбохтору туруоран эрэллэр, футболлуур хонууга искусственнай газону саҥардаллар, аспаал ууруллар.

Стадиону сырдатыы аныгы технологияны тутуһуллан оҥоһуллуоҕа, куттал суох буолуута хааччыллыаҕа.  Эбийиэккэ 140 киһи үлэлиир.  Маны таһынан, Комсомольскай болуоссакка хапытаалынай өрөмүөн оҥоһулла турар.

Бу күннэргэ болуоссаты аспаалынан бүрүйүөхтэрэ. Манна күрэхтэһиилэр кыайыылаахтарын уонна призердарын наҕараадалыахтара.

Көһө сылдьар мунньах чэрчитинэн Ил Дархан Дьокуускай куораты тупсарыы эбийиэктэрин кытта билистэ.  Бестужев-Марлинскай уулуссатыгар 16 кыбартыыралаах дьиэ көтүрүллэр. Бу дьиэ Уу тырааныспарын институтун аттыгар турар буолан,   сотору кэминэн манна Речниктэр искибиэрдэрэ оҥоһуллуоҕа.  Айсен Николаев дьон сөбүлээн сынньанар, кэрэхсиир уопсастыбаннай сирдэрин курдук бырайыагы оҥорорго сорудахтаата.