Бүгүн, ахсынньы 26 күнүгэр, Ил Дархан Айсен Николаев Саха сиригэр анал байыаннай дьайыыларга хорсун быһыыны көрдөрбүт, экстремальнай быһыыга-майгыга дьону быыһаабыт уонна өрөспүүбүлүкэ социальнай-экэнэмиичэскэй сайдыытыгар кылааты киллэрбит биллэр-көстөр дьоммутугар судаарыстыбаннай наҕараадалары туттарда.
Саҥа дьыл иннигэр наҕараадалары Арассыыйа Сэбилэниилээх күүстэрин, баһаарынай сулууспа, доруобуйа харыстабылын, үөрэхтээһин, култуура, бырамыысыланнас, тырааныспар, тутуу комплексын уонна тыа хаһаайыстыбатын бэрэстэбиитэллэрэ ыллылар. Ол курдук, Арассыыйа Федерациятын уонна Саха Өрөспүүбүлүкэтин судаарыстыбаннай наҕараадаларын 51 киһиэхэ туттардылар.
«2022 сыл – өрөспүүбүлүкэбит 100 сылыгар биһиги ыарахаттары туоруур, ордук уустук балаһыанньаны тулуйар уонна үрдүк таһымы ситиһэр кыахтаахпытын көрдөрдө. Бүгүн биһиги биллэр-көстөр биир дойдулаахтарбытын, Саха сирин киэн туттар уонна албан ааттаах дьонун чиэстээтибит. Мин бүгүн ис сүрэхпиттэн өрөспүүбүлүкэ сайдарын туһугар оҥорбут тус кылааккыт, Арассыыйа тускутун туһугар үлэҕит иһин махтанабын!», – диэн эттэ Айсен Николаев.
Анал байыаннай эпэрээссийэҕэ бэйэтин харыстаммакка, хорсун быһыыны көрдөрбүтүн иһин ыстаарсай сапер Тускул Винокуров “Эр санаа” уордьанынан, үтүө суобастаах өр сыллаах үлэтин иһин “Доҕордоһуу” уордьанынан “Комдрагметалл РС(Я)” АУо генеральнай дириэктэрэ Александр Кычкин, дьиэ кэргэн уонна оҕону иитии институтун бөҕөргөтүү иһин “Төрөппүт Албан аата” уордьанынан элбэх оҕолоох ийэ, уон оҕону иитэ сылдьар Кристина Игнатьева, экстремальнай балаһыанньаҕа дьону быыһыырга ураты хорсун быһыытын иһин “Баһаарга хорсунун иһин” мэтээлинэн Анаабыр национальнай улууһун 10-с №-дээх Баһаарынай сулууспатын этэрээтин Сааскылаах сэлиэнньэтин харабылын 1-гы №-дээх баһаарынай чааһын караулун начальнига Владимир Семенов наҕараадаланнылар.
Саха сирин үгүс туруу үлэһит дьоно бүгүн Арассыыйа уонна өрөспүүбүлүкэ үтүөлээх үлэһиттэрин аатын ыллылар, Арассыыйа Бэрэсидьиэнин махтал суругунан, РФ Сэбиэтин Федерациятын бочуотун грамотатынан, Саха Өрөспүүбүлүкэтин Баһылыгын грамоталарынан уонна өрөспүүбүлүкэ судаарыстыбаннай бэлиэлэринэн наҕараадаланнылар.
Наҕараадаламмыт дьон ааттарыттан М.Г. Сафронов аатынан Дьокуускайдааҕы тыа хаһаайыстыбатын научнай институтун лабораториятын кылаабынай научнай үлэһитэ, ветеринарнай билим доктора, профессор Михаил Неустроев тыл эттэ.
Кини Арассыыйа Бэрэсидьиэнигэр уонна Саха Өрөспүүбүлүкэтин Аҕа баһылыгар, наҕараадаламмыт дьон үлэлэрин үрдүктүк сыаналаабыттарын иһин улахан махталын биллэрдэ.
«Бу үрдүк наҕараадалар биһигини улуу Арассыыйа уонна төрөөбүт Сахабыт сирэ сайдарыгар өссө күүскэ, хорутуулаахтык үлэлиирбитигэр эбээһинэстиир», – диэн бэлиэтээтэ Михаил Петрович.
«Мин төрөппүттэрбэр уонна аймахтарбар махталбын тириэрдэбин. Онтон анал байыаннай дьайыыларга инники күөҥҥэ сылдьар уолаттарга ситиһиини баҕарабын!», – диэн эттэ «Эр санаа» уордьан кавалера Тускул Винокуров.
«Төрөппүт Албан аата» уордьанынан наҕараадаламмыппыттан олус үөрдүм. Ийэ сыла биһиэхэ бастыҥ сылынан буолла. Элбэх оҕолоох ыалга көмө уонна улахан өйөбүл оҥоһулунна. Оҕону иитии, улаатыннарыы – бу дьол, биһиги баайбыт уонна кэскилбит буолар», – диэн бэлиэтээтэ Кристина Игнатьева.
Бу ураты каарта оҕолорго төрөөбүт дойдуларын дириҥник өйдүүргэ уонна умнуллубат өйдөбүллэри бэлэхтиэҕэ. Манна Саха сирин…
Соторутааҕыта Ыксаллаах быһыы-майгы министиэристибэтин 35 сылыгар аналлаах тэрээһин Уһук Илин бастыҥ баһаарынайдарын түмтэ. Бу туһунан…
От ыйын 3 күнүттэн 5 күнүгэр диэри Нерюнгрига өрөспүүбүлүкэтээҕи Олоҥхо ыһыаҕа ыытылларынан сибээстээн, арыгыны атыылааһыҥҥа…
От ыйын 4-8 күннэригэр Дьокуускайдааҕы VIII норуоттар икки ардыларынааҕы киинэ бэстибээлэ ыытыллыаҕа. Быйылгы бэстибээл сүрүн…
Бүгүн Мииринэй оройуонугар баар «Саха сирин тыыннаах алмаастара» пааркаҕа («Живые алмазы Якутии») пааркаттан үөрүүлээх сонун…
Өлүөхүмэҕэ саҥа оҕо поликлиникатын үөрүүлээхтик астылар. Урут поликлиника 1980-с сыллардааҕы дьиэҕэ баар эбит. Билигин тэрилтэҕэ…