Ил Дархан Сунтаарга байыаннай дьайыы кыттыылааҕын төрөппүттэрин кытта көрүстэ

Бэҕэһээ Ил Дархан Айсен Николаев Сунтаарга  оробуочай сырыытын кэмигэр, байыаннай дьайыы кыттыылааҕын төрөппүттэрин кытта көрүстэ.  

Анатолий Семенов быстах хомуурунан  байыаннай дьайыыга барбыта иккис сыла буолла. Ыксаллаах быһыыга, дойдуга бүрүүкээбит уустук кэмҥэ хорсун быһыыны көрдөрөн, сулууспаҕа бастыҥнар ортолоругар киирэн, билигин снабженец-старшина дуоһунастаах сулууспалыы сылдьар диэн Сунтаар улууһун дьаһалтатын пресс-сулууспата иһитиннэрдэ.

Ил Дарханы кытта көрсүһүүгэ Матрена уонна Анатолий Семеновтар уолаттарынан киэн тутталларын уонна кини хайдах сулууспалыы сылдьарын туһунан кэпсээтилэр. Анатолий бэйэтэ кэргэннээх, 4-с кылааска үөрэнэр оҕолоох. Ааспыт сылга Дьокуускайга көһөн олохсуйан олороллор.

Анатолий  видеосибээһинэн кини ротатыгар сахалар төһө баалларын, туох кыһалҕалар туралларын кэпсээтэ. Суол хаачыстыбата мөлтөх, бадарааннаах буолан УАЗ массыына олус наадалааҕын бэлиэтээн эттэ.