Ил Дархан сырьета суох экспоры сайыннарыыны хаттаан көрөргө сорудахтаата

Өрөспүүбүлүкэ баһылыга Айсен Николаев өрөспүүбүлүкэтээҕи биэдэмистибэлэри уонна салаа тэрилтэлэри кытта сүбэ мунньахха сырьета суох экспоры сайыннарыыга кэлимник көрүүлэр суохтарын бэлиэтээтэ уонна бу үлэ тиһиктээх буоларын ирдээтэ.

Айсен Николаев күн бүгүн экспорт сүрүннээн бөдөҥ бырамыысыланнай тэрилтэлэринэн оҥоһулларын тоһоҕолоон эттэ, манна дьоҕус уонна орто урбааны тардар наадалааҕын ыйда.

“Олус чуолкай тиһик оҥоһуллуох тустаах, онно салаа министиэристибэлэр, Экспоры өйүүр киин, Саха сирин сайыннарар корпорация уонна Инвестициялары тардар уонна экспоры өйүүр ааҕыныстыба хабыллыахтаахтар. Итиннэ түмүк биир эрэ буолуохтаах — төһө бородууксуйа өрөспүүбүлүкэ тас өттүгэр атыыланна», — диэтэ Айсен Николаев.

Ил Дархан сырьета суох экспоры сайыннарыыга чуолкай стратегияны оҥорорго сорудахтаата. Бу үлэҕэ эппиэтинэстээҕинэн бырабыыталыстыба бэрэссэдээтэлин бастакы солбуйааччы Дьулустаан Борисов ананна.

Эрэгийиэн тахсыан сөп кэскиллээх ырыынактара төһө барыстаахтарын  көрүү уонна бородууксуйаны оҥорор дьоҕус уонна орто урбаанньыттары өйөөһүн саамай суолталаахтар диэтэ. Маннык табаардарга уонна өҥөлөргө чуолаан, Саха сирин кытта бииргэ үлэлэһэр КГТ дойдулара интэриэстээхтэр.

“Көҕүлүүр, үлэлиэн баҕалаахтары өйүөххэ наада. Уһулуччу үлэлээх урбаанньыттарга көмөнү оҥорорго уонна бэйэбит национальнай чөмпүйүөннэрбитин иитэн таһаарыахха”, — диэн эбэн эттэ өрөспүүбүлүкэ баһылыга.

Кэскиллээх хайысхаларынан ювелирнай бородууксуйа, сэлии муоһуттан оҥоһуллубут оҥоһуктар, ас-үөл бородууксуйата, ону тэҥэ IT-өҥөлөр, туризм, киинэ, анимация уонна интеллектуальнай бас билии ааттаннылар, диэн иһитиннэрэр Ил Дархан, бырабыыталыстыба пресс-сулууспата.