Ил Дархан табаһыттары кытта көрүстэ

СӨ Ил Дархана Айсен Николаев Дьокуускайга табаһыттар сийиэстэрин иитинэн Сайсарыга ыытыллыбыт тэрээһиҥҥэ сырытта.

Табаһыттар оонньууларыгар 19 улуустан хамаандалар көхтөөхтүк кытыннылар. Тэрээһин сүргэни көтөҕөр бэртээхэй сэлэлээн хаамыыттан саҕаланна.

Ил Дархан Муоматтан кэлбит, 37 сыл табаһыттаабыт, удьуорун утумнаабыт, «Кукуин» родовой община биригэдьиирин, 2024 сыллаахха В.М.Кладкин аатынан Судаарыстыбаннай бириэмийэ лауреатынан буолбут Аркадий Слепцовы көрүстэ. Бу дьиэ кэргэн, ыал ийэтэ Евдокия Спартаковна, уолаттара Ростислав уонна Дмитрий бары тутуспутунан сылдьаллар, бииргэ үлэлииллэр. Түгэнинэн туһанан санаттахха, Слепцовтар «Көс олохтоох дьиэ кэргэн» өрөспүүбүлүкэтээҕи күөн күрэс кыайыылааҕынан буолан тураллар. 2024 сылга табаларын ахсаана 1328 буолбут, кэнники үс сылга 270 төбө эбиллибит.

Маны сэргэ Ил Дархан Айсен Николаев уус-уран оҥоһуктар быыстапка-дьаарбаҥкаларын көрдө. Бу быыстапка-дьаарбаҥкаҕа 12 улуустан кыттыбыттар. Булуҥ, Муома, Анаабыр, Өймөкөөн улуустарын бэрэстэбиитэллэрэ манна аҕалбыт оҥоһуктарын сырдаттылар. Айсен Николаев Тополинай (Томпо улууһа) табаһыттарын эмиэ көрүстэ.

Ил Дархан бэлиэтээбитинэн, өрөспүүбүлүкэҕэ таба ахсаана 162 тыһ. тиийбит. Бу дойдуга үһүс миэстэ буолар.

«Биир тыһыынчаттан тахса киһи ыстаадаларга үлэлиир, көс олохтоох дьон. Кинилэр үгэһи тутуһан илдьэ сылдьаллар. Мин билигин табаһыттары кытары кэпсэттим. Кинилэр санааларын, туруорсууларын иһиттим. Бу боппуруостарын биһиги өрөспүүбүлүкэ уонна федеральнай таһымҥа быһаарыахпыт«, — диэтэ Айсен Николаев. Кини быйылгы сийиэскэ элбэх эдэр табаһыт кэлбитин бэлиэтээтэ.  Бу кинилэр бастакы кыттыылара, үөрүйэхтээх табаһыттартан элбэххэ үөрэниилэрэ буоларын ыйда.

«Сийиэс — бу күрэхтэһии эрэ буолбатах. Бу үгэһи харыстыыр кыахтаныы, сүрүн боппуруостары дьүүллэһии, билиини-көрүүнү, үлэҕэ үөрүйэҕи эдэр көлүөнэҕэ иҥэрии. Бу Саха сиригэр табаны иитиинэн дьарыктаныы сайдарыгар саҥа, бигэ тирэҕи биэрэригэр эрэнэбин«, — диэн бэлиэтиир Ил Дархан.

Табаһыттар оонньууларыгар ыытыллар алта араас көрүҥ күрэхтэһиигэ 70 эр киһи уонна дьахталлар күүстэрин, кыахтарын, тулуурдарын, сатабылларын холоһоллор. Табанан сүүрдүү, эстэпиэтэ, маамыкта быраҕыыта, табаны миинэн баран сүүрдүү, уо.д.а. күрэстэр бааллар. Манна даҕатан эттэххэ, күөн күрэскэ анаан Булуҥтан уонна Эбээн Бытантайтан табаларын сөмөлүөтүнэн аҕалбыттара. Онтон атын улуустар көлөнөн тиэйэн аҕалтаабыттар.

Санатан эттэххэ, табаһыттар IV сийиэстэрэ Дьокуускайга кулун тутар 18-21 күннэригэр ыытыллар. Манна 250 кэриҥэ киһи кыттар. Далааһыннаах тэрээһиҥҥэ Абыйтан, Алдантан, Анаабыртан, Булуҥтан, Дьааҥыттан, Үөһээ Халыматтан, Эдьигээнтэн, Кэбээйиттэн, Муоматтан, Аллараа Халыматтан, Өймөкөөнтөн, Өлүөхүмэттэн, Өлөөнтөн, Орто Халыматтан, Томпоттон, Уус Маайаттан, Усуйаанаттан, Эбээн Бытантайтан, Нерюнгриттэн, ону сэргэ Дьокуускайтан, Мурманскайтан, Москваттан, Чукоткаттан, Тываттан, Монголияттан, Кытайтан кытталлар.

СӨ Ил Дарханын уонна Бырабыыталыстыбатын пресс-сулууспата

Андрей Сорокин хаартыскаларга түһэриитэ, СИА