Ил Дархан төрөппүттэрэ ыыппыт «Хантер» УАЗ массыыналарын биир дойдулаах байыастара туттулар

Ил Дархан Айсен Николаев төрөппүттэрэ – СӨ уонна РФ үтүөлээх учуутала, Үөһээ Бүлүүтээҕи лиссиэй физикаҕа учуутала, Үөһээ Бүлүү бочуоттаах олохтооҕо Александр Андреевич уонна Арассыыйа орто үөрэхтээһинин бочуоттаах үлэһитэ, Үөһээ Бүлүү бочуоттаах олохтооҕо Тамара Сергеевна байыаннай дьайыыга сылдьар биир дойдулаахтарыгар «Хантер» УАЗ массыыналарын ыыппыттара.

Бу күннэргэ массыына анаммыт сиригэр тиийдэ, ону Ростовка сылдьар Үөһээ Бүлүү улууһун дьаһалтатын дьыалатын салайыыга солбуйааччы Михаил Егоров көрсөн тиксэрбитин туһунан улуус баһылыга Валерий Николаев иһитиннэрдэ.

Михаил Михайлович Ил Дархан төрөппүттэрэ ыыппыт массыыналарын Запорожскай уобаласка сулууспалыы сылдьар уолаттарга илдьэн туттарбыт.

«УАЗ массыына сырыыта сыыдам, кыайыыны чугаһатарга өйөбүл, уолаттарга эбии көмө көлө буоллун диэн алҕаан, туох баар бары үтүө санааны этэн, ис сүрэхтэриттэн биэрбит массыыналарын бэс ыйыгар Үөһээ Бүлүүттэн Дьокуускай куоракка илдьэн байыаннай дьайыыга туһанарга сөптөөх гына оҥорон-чочуйан баран Ростовка ыыппыппыт. Уолаттар тимир көлө кэлбитигэр олус үөрдүлэр, Тамара Сергеевнаҕа уонна Александр Андреевичка улахан махтал тылларын тиэрдэллэр. Массыына анал байыаннай дьайыы хонуутугар олус туһалаах тиэхиньикэ буолуоҕа, кыргыһыы хонуутуттан уолаттарбытын уонна бааһырбыт байыастары таһаарарга абыраллаах тэрил буолуоҕа диэн уолаттарбыт санааларын эттилэр. Тимир көлө уолаттарбытын абырыы сырыттын, эрэллээх доҕор буоллун! Тамара Сергеевнаҕа уонна Александр Андреевичка өйөбүллэрин, көмөлөрүн, өрүү дойдуларын – Үөһээ Бүлүүлэрин туһугар туохха да тэҥнэммэт кылааты киллэрэллэрин иһин ис сүрэхтэн махтанабыт! Чэгиэн-чэбдик, дьоллоох, уһун олохтоох буолллуннар диэн баҕа санаабытын этэбит!», — диэн Үөһээ Бүлүү улууһун баһылыга Валерий Николаев махталын биллэрэр.