Ил Дархан Терроризмы утары охсуһар хамыыһыйа мунньаҕын ыытта

Бүгүн, атырдьах ыйын 19 күнүгэр, Айсен Николаев өрөспүүбүлүкэҕэ Терроризмы утары охсуһар хамыыһыйа уонна Суһал ыстаап холбоһуктаах мунньаҕын ыытта.

Мунньахха терроризмы утары охсуһуу эйгэтигэр тэрээһиннэри олоххо киллэриигэ эппиэттээх өрөспүүбүлүкэ ситэриилээх былааһын уорганнарын уонна олохтоох салайыныы уорганнарын үлэһиттэрин, ол иһигэр үөрэхтээһин эйгэтин уонна үөрэх тэрилтэлэрин үлэһиттэрин  таһымын туругун уонна тупсарыыга миэрэлэр тустарынан боппуруос дьүүллэһилиннэ.

Үөрэх уонна билим министиэристибэтин иһитиннэриитинэн, быйылгы сыл устата үөрэх тиһигин бары таһымнарын – оскуола иннинээҕи саастаах оҕо тэрилтэлэриттэн саҕалаан, идэлээх үөрэх тэрилтэлэригэр тиийэ хабар комплекснай тэрээһиннэр ыытыллыбыттар, онно 2 тыһыынчаттан тахса киһи кыттыбыт.

Атырдьах ыйынааҕы тэрээһиннэр чэрчитинэн комплекснай куттал суох буолуутун хааччыйыы боппуруостарыгар практическай сессия ыытыллыаҕа. Үөрэх тэрилтэлэрэ бары сэбилэниилээх саба түһүү кэмигэр харабыл уонна тэрилтэ үлэһиттэрин дьайыыларын, комплекснай сценарийы оҥорон көрөргө Бүтүн Арассыыйатааҕы терроризмы утары үөрэхтэргэ кыттыахтара.

ХИФУ бэрэстэбиитэлэ иһитиннэрбитинэн, университет Сүбэлиир-тэрийэр киинэ 8 үөрэх бырагырааматын, квалификацияны үрдэтэр куурустары олоххо киллэрэр, үөрэтии географията өрөспүүбүлүкэ улуустарыгар күнүскү уонна дистанционнай көрүҕнэрин дьүөрэлээн туһанан кэҥээн иһэр.

Быйылтеррористическай дьайыыларга пилота суох көппүт аппарааттары туһаныыга сыһыаннаах бүгүҥҥү кутталы үөскэтэр суоһааһыннарга анаммыт эбии модуль киллэриллибит. Ил Дархан үөрэх тэрилтэлэригэр үөрэнээччилэр информацияҕа кутталлара суох буолуутун хааччыйыыга, терроризм идеологиятын утары охсуһууга уонна экстремизми сэрэтиигэ туһуламмыт миэрэлэри күүһүрдэргэ сорук туруорда.

Ону таһынан мунньахха балаҕан ыйын 1 күнүгэр – Билии күнүн, балаҕан ыйын 3 күнүгэр – Терроризмы утары охсуһууга сомоҕолоһуу күнүн, балаҕан ыйын 14 күнүгэр – Биир кэлим куоластааһын күнүн кэмигэр куттал суох буолуутун таһымын үрдэтиигэ туһуламмыт эбии миэрэлэри ылыныы туһунан кэпсэтии барда.

Маны таһынан, террористическай саба түһүүлэртэн хас да эбийиэк куттала суох буолуутун, ол иһигэр терроризмы утары уонна диверсияны утары көмүскэллээх буолуутун хааччыйыы боппуруоһа көрүлүннэ. Ил Дархан эрэгийиэн олоҕор-дьаһаҕар суолталаах эбийиэктэр кутталларын суох оҥорууну уонна көмүскэли хааччыйар тэрийэр-сэрэтэр миэрэлэри олоххо киллэриигэ тэрилтэлэр салайааччыларын эппиэтинэстэрин үрдэтэр наадалааҕын ыйда.

Айсен Николаев эбийиэктэр көмүскэллээх буолууларын хааччыйыыга Куттал суох буолуутун сэбиэтин уонна Национальнай антитеррористическай кэмитиэт бары соруктара толоруллуохтаахтарын бэлиэтээтэ.