Ил Дархан Тимир суол үлэһитин күнүнэн эҕэрдэлиир

Күндү Саха Өрөспүүбүлүкэтин тимир суол тырааныспарын үлэһиттэрэ уонна бэтэрээннэрэ!

Саха Өрөспүүбүлүкэтин салалтатын аатыттан уонна тус бэйэм ааппыттан эһигини идэлээх бырааһынньыккытынан — Тимир суол үлэһитин күнүнэн ис сүрэхпиттэн эҕэрдэлиибин!

Тимир суол биһиги өрөспүүбүлүкэбит олоҕор ураты миэстэни ылар. Эһиги бэйэни харыстаммакка үлэҕит түмүгэр, өрөспүүбүлүкэбит тыһыынчанан биэрэстэлээх киэҥ нэлэмэн сирин көрдөрөҕүт. Эһиги Саха сирин саамай ыраах нэһилиэнньэлээх пууннарыгар бүтүн өрөспүүбүлүкэбитин уонна биһиги улуу дойдубутун кытта биир кэлим буолан олорорго көмөлөһөҕүт. Экэниэмикэ бигэ үлэтин хааччыйаҕыт, бырамыысыланнас сайдарыгар кыах биэрэҕит, дьон олоҕун хаачыстыбатын тупсараҕыт уонна эрэгийиэн бигэ туруктаах кэскилигэр сүҥкэн кылааккытын киллэрэҕит.

Бүгүн «Саха сирин тимир суоллара» акционернай хампаанньа — өрөспүүбүлүкэ биир бастыҥ тэрилтэтэ, эрэгийиэн экэниэмикэтин лиидэрэ буолар. Кэлэктиип үлэтинэн Саха сиригэр эрэ буолбакка, бүтүн Уһук Илиҥҥэ суолталаах киэҥ хабааннаах инфраструктурнай бырайыактар олоххо киирэллэр. 2024 сыл суолталаах түгэнинэн Таһаҕас тэрминээлигэр киирэр суолу үлэҕэ киллэрии буолла. Бу бырайыак Дьокуускайга, өрөспүүбүлүкэ хотугу улуустарыгар, ону тэҥэ Өлүөхүмэ уонна Ленскэй улуустарыгар таһаҕаһы тиэрдэр мультимодальнай көрүдүөрү аста, бу Өлүөнэ өрүс үөһээ тардыыта чычааһырар усулуобуйатыгар ордук туһалаах. Аллараа Бэстээх ыстаансыйата тимир суолунан уонна уунан быһа холбоһуктаах сибээстэннэ, оттон өрөспүүбүлүкэ бэйэтин устуоруйатыгар аан бастаан хотугу таһаҕас 80 бырыһыана баар Өлүөнэ өрүскэ тимир суолунан таҕыста.

Иннибитигэр — саҥа саҕахтар. Мохэ (КНР) – Джалинда – Сковородино – Аллараа Бэстээх тимир суол магистралын кыраныыссаны туоруур пуунуун уонна Амуру туоруур күргэтин ситимниир Хотугулуу-Илиҥҥи  тырааныпсра көрүдүөрүн бырайыага олоххо киириитэ «ССТС» АК иннигэр сүүнэ кыахтары арыйыа. Бу көрүдүөр Саха сирин уонна Арассыыйа Хотугулуу-Илиҥҥин киэҥ сирдэрин Кытай провинцияларын уонна Азия дойдуларын кытта ситимниэ, Чуумпу уонна Хотугу Муустаах акыйааннарга саҥа тахсыылары хааччыйыа. Биһиги сүрүн баайбыт — дьон. Биир аҥаар тыһыынчаттан тахса идэлээх үлэһит — машинистар уонн апроводниктар, диспетчердэр уонна өрөмүөнньүктэр, инженердэр уонна салайааччылар — күн аайы өрөспүүбүлүкэ туһугар үлэлииллэр-хамсыыллар.

Эһиги идэҕитигэр бэриниигит уонна үрдүк таһымнаах буолаҥҥыт, салаа эрэллээхтик сайдар: 2024 сылга таһаҕас таһыытын кээмэйэ 8,3 мөл. туоннаҕа тиийдэ, оттон дьону таһыы 423 тыһыынча киһи буолла. Тимир суолга үлэ — күннээҕи ыарахан үлэ. Тыйыс килиимэт усулуобуйатыгар, уустук логистикаҕа уонна куттал суох буолуутугар үрдүк ирдэбиллэргэ эһиги Саха сирин олоҕун уонна сайдыытын хааччыйаҕыт, бырамыысыланнаһы өйүүгүт уонна таһаҕаһы кэмигэр тиэрдэҕит. Ытыктабыллаах бэтэрээннэрбитигэр ураты махтал тылларбын тиэрдэбин.

Эһиги өрөспүүбүлүкэ тимир суолун салаатын саҕаланыытыгар турбуккут, олус ыарахан усулуобуйаларга ону тэрийбиккит, бүгүҥҥү ситиһиилэрин уонна идэҕэ бэринии үгэстэрин олоҕун уурбуккут.

Эһиги холобургут — тулуур уонна хорсун быһыы бэлиэтэ. Бүтүн Саха сирин олохтоохторун ааттарыттан эһиэхэ ис сүрэхтэн ытыктабылы уонна махталы тиэрдэбин. Күндү тимир суол үлэһиттэрэ! Бу бырааһынньык күн үлэҕит иһин дириҥ махтал тылларын ылыҥ. Эһиэхэ чэгиэн доруобуйаны, дьолу, этэҥҥэ буолууну уонна идэҕитигэр саҥа ситиһиилэри баҕарабын. Дьиэ кэргэҥҥитигэр өрүү сылаас, таптал уонна чугас дьоҥҥут өйөбүлэ баар буоллун. Бырааһынньыгынан, күндү тимир суол үлэһиттэрэ!

Саха Өрөспүүбүлүкэтин Ил Дархана Айсен Николаев