Ил Дархан Туймаада ыһыаҕынан эҕэрдэтэ

Ытыктабыллаах Сахам сирин олохтоохторо! Күндү ыалдьыттар! Эһигини Улуу Туймаада хочотун үрүҥ тунах ыһыаҕынан эҕэрдэлиибин!

Үгүс үйэлэр тухары ыһыах айылҕа тыйыс тымныылаах уһун кыһын кэнниттэн ордук ситэн-силигилээн турар кэмигэр бэлиэтэнэр. «Ыһыах» диэн уйгуну-быйаҥы кытта ыкса ситимнээх өйдөбүл. Бу күн биһиги айылҕабытын кытта алтыһабыт, доҕотторбутун, дьиэ кэргэммитин кытта түмсэбит. Үйэттэн үйэҕэ өбүгэлэрбит түстээбиттэрин курдук, үйэлэр уонна көлүөнэлэр ситимнэрэ быстыбакка салҕанан барарын туһугар алгыс түһэрэн, үөһээ айыылартан эйэни, чэлгийэ сайдыыны, этэҥҥэ буолууну көрдөһөбүт. Сыл ахсын ыытыллар бырааһынньык Саха сирин олохтоохторугар сүҥкэн суолталаах түгэҥҥэ ананар. Ол курдук, Туймаада быйылгы ыһыаҕа Аҕа дойду Улуу сэриитигэр Кыайыы 80 сылыгар, Россия Федерациятыгар Аҕа дойдуну көмүскээччи сылыгар уонна Саха Өрөспүүбүлүкэтигэр Ийэ дойдуну көмүскээччи сылыгар ананан ыытыллар. Өрөспүүбүлүкэ олохтоохторо бырааһынньыктары Аҕа дойду Улуу сэриитин кыттыылаахтарын, сэрии уонна тыыл бэтэрээннэрин кытта бииргэ бэлиэтиир ураты дьоллоохпут.

Туймаада Ыһыаҕа – улуу Россия сиригэр-уотугар саамай киэҥ хабааннаах национальнай бырааһынньык. Үгэс быһыытынан бу ыһыах ирбэт тоҥҥо тутуллубут саамай бөдөҥ куорат – Дьокуускай – ытык хочотугар ыытыллар.

Бу дьыл муус устар 1 күнүгэр Россия президенэ Владимир Путин 2032 сылга Дьокуускай 400 сыллаах үбүлүөйүн бэлиэтиир туһунан ыйаахха илии баттаабыта. Саха сирин олохтоохторо бу быһаарыытын иһин дойду баһылыгар истиҥник махтанабыт. Дьокуускай – өрөспүүбүлүкэбит тэбэр сүрэҕэ, үүнүү-сайдыы киинэ. Куораппыт ирбэт тоҥҥо бастыҥ куорат буоларын туһугар

стратегическай докумуону – маастар-былааны ырытан оҥордубут. Ол курдук, үөрэх, култуура, успуорт, доруобуйа харыстабылын, туризм тэрилтэлэрин тутар, суол инфраструктуратын, инженернэй ситимнэри уонна куорат эйгэтин тупсарар, гражданнары саахалланар туруктаах олорор дьиэлэртэн көһөрөр былааннаахпыт. Ону тэҥэ Дьокуускай маастар-былааныгар Өлүөнэ өрүһү туоруур муостаны тутуу суотугар куорат экэниэмикэтин тутулун уларытыы уонна креативнай индустриялары сайыннарыы көрүллэр. Муоста тутулуннаҕына Саха сирэ дойду атын эрэгийиэннэригэр тахсар суола арыллыаҕа, тырааныспар сырыыта 20 бырыһыантан 87 бырыһыаҥҥа диэри элбиэҕэ, өрөспүүбүлүкэ устуоруйатыгар аан бастаан федеральнай трассаҕа сылы эргиччи тахсар кыахтаныахпыт.

Бырааһынньыктарбыт  киэҥ хабааннаах буолуохтара!

Ааспыт сылга Туймаада ыһыаҕа 230 тыһыынчаттан тахса киһини түмпүтэ. Бу биһиги норуоппут култууратын, үгэстэрин чөл хаалларар, сайыннарар үлэбит түмүгэ. Эрэгийиэн тэтимнээхтик сайдыыта үйэлэргэ мунньуллубут өйбүт-санаабыт, култуурабыт, устуоруйабыт үйэлээх баайын кытта ыкса ситимнээҕэ Саха сирин олохтоохторугар улахан суолталаах.

Быйылгы үрүҥ тунах ыһыахпытыгар ыҥырыллан кэлбит күндү ыалдьыттарбытыгар үгэс быһыытынан туох баар бастыҥмытын, кэрэбитин көрдөрөргө бэлэммит. Туймаада ыһыаҕын түһүлгэтэ өрөспүүбүлүкэ норуоттарын, дойдубут эрэгийиэннэриттэн уонна тас дойдулартан кэлэр ыалдьыттары барыларын түмэр.

Үс Хатыҥҥа 20 түһүлгэҕэ 100-тэн тахса араас култуурунай бырагыраама ыытыллара былааннанар, ол иһигэр сиэри-туому толоруу, куонкурустар, быыстапкалар, оҕолорго аналлаах тэрээһиннэр, успуорт күрэхтэһиилэрэ уонна 50-тан тахса кэнсиэрт буолуоҕа. 17 ураты быһыылаах куонкурус тэриллиэхтээх, олортон үксэ сыл ахсын үгэскэ кубулуйан ыытыллара кэрэхсэбиллээх.

Ытыктабыллаах Сахам сирин олохтоохторо! Күндү ыалдьыттар!

Өссө төгүл эһигини Туймаада ыһыаҕынан эҕэрдэлиибин! Эһиэхэ уонна чугас дьоҥҥутугар чэгиэн доруобуйаны, этэҥҥэ буолууну баҕарабын! Ыһыахха этиллибит алгыс хас биирдии дьиэҕэ үтүөнү уонна дьолу аҕаллын, Ийэ дойдубут кэскилин туруулаһа сылдьар буойуннарбытыгар күүһү-уоҕу уонна халбаҥнаабат бигэ санааны эптин. Уруй-туску, айхал-мичил!

Саха Өрөспүүбүлүкэтин Ил Дархана Николаев А.С.